Көкпекті ауданында егін шаруашылығы саласында соңғы технологиялар қолданылуда
Бұл туралы аудан әкімі Ділдәбек Оразбаев Абай өңірлік коммуникациялар қызметінде өткен баспасөз мәжілісінде айтып берді.
Аудан әкімінің айтуынша, 2022 жылы Көкпекті ауданында 86 901 гектар егістік жер игерілді. Оның ішінде 56 мың гектар жерге дәнді дақылдар, 31 гектар жерге майлы дәнді дақылдар егіліп, орта есеппен гектарына 10 -11 центнерден өнім алынған.
— Былтыр жауын-шашынның аздығына және ауа-райының қолайсыздығына байланысты, орта есеппен гектарына 10 центнерден өнім алдық. Өткен жылы атмосфералық ылғал 350 мм-ді құраса, биыл 500-600 мм болады деп күтілуде. Сол себепті биыл өнім көлемі жоғары болады деп жоспарлап отырмыз. Ауданда күнбағыс өсіру жақсы дамыған. 31 мың гектар жерге күнбағыс егілуде,- деді аудан әкімі Д.Оразбаев.
Аудан әкімінің айтуынша, Көкпектіде егін шаруашылығы саласында соңғы технологиялар қолданылуда.
— Өзім осы саланың маманы болғаннан кейін жаңа технологияларды өндіріске енгізуге мән берудемін. Әзірше Көкпекті ауданында егін шаруашылығы саласында нөлдік технологияны қолданып жатқандар саусақпен санарлық. Бірақ өз нәтижесін беруде. Бұл технология шығындарды азайтып, өнімнің өзіндік құнын төмендетеді. Биылғы жылы тағы бірнеше шаруа қожалықтарына енгіземіз. Сонымен қатар жоғары сортты, элиталы, супер элиталы тұқымдарды егу бойынша жұмыстар жүргіземіз. Қазірдің өзінде супер элиталы тұқымдар сатып алынды, – деді аудан әкімі Д.Оразбаев.
Аудан әкімі сондай-ақ интенсивті технологияны қолданып, аз жерден көп өнім алуға көшуді қолға алатынын жеткізді.
2023 жылы ауданда 3000 га жерді жаңбырлатып суғару жоспарлануда. Бүгінгі күні «Елім-ай» ЖШС-де 12 жаңбырлатып суғару машинасы қойылып, іске қосылды. Қожалық тағы 10 жаңбырлатып суғару машиналарын орнатуды жоспарлауда.
— Осы жылдан бастап Көкпекті ауданында жайып суғару (лиманное орошение) әдісін қолданылатын боламыз. Аудан бойынша бұл әдіспен 21 830 гектар жер суаруды көздеп отырмыз,- деді Д.Оразбаев.
Айта кетейік, Көкпекті ауданында 2022 жылы ауыл шаруашылығының жалпы өнім көлемі 36 млрд 704 млн теңгені құрап, өткен жылдың сәйкес кезеңімен салыстырғанда өсу қарқыны 107,9 пайызды құрады. Оның 13 млрд теңгесі өсімдік шаруашылығына, 24 млрд. теңге мал шаруашылығына тиесілі.
