Семей қаласының әкімі Нұрбол Нұрсағатов Кирпичный, Жоламан, Суық бұлақ кенттерінің тұрғындарымен кездесу өткізді.
Кездесуде шаһар басшысы 2022 жылы атқарылған жұмыстар туралы баяндап, алдағы жоспарлармен таныстырды.
Қала әкімінің баяндамасынан соң тұрғындарға сөз кезегі берілді. Тұрғындар көктемгі су тасқынының алдын алу, қаңғыбас иттерді аулау, қосымша қоғамдық көлік бағыттарын ашу, көше жолдарын жөндеу сынды мәселелерді көтерді.
— Алдағы уақытта қала ішінде жалпы саны 100 көшеде жарықтандыру жұмыстарын жүргізуді жоспарлап отырмыз. Соның ішінде Суық бұлақ кентіндегі істен шыққан көше шамдары жөндеуден өткізіліп, Сырлыбаев көшесіне ұзындығы 800 метр, Рехтика көшесіне 900 метр болатын жарықтандырулар орнатылады, істен шыққан шамдар ішінара ауыстырылатын болады. Қазіргі таңда қала ішіндегі барлық жарық бағаналарына егжей-тегжейлі тексеру жұмыстары жүргізіліп жатыр,- деді қала әкімі Нұрбол Нұрсағатов.
Кирпичный кентіндегі көп қабатты үйлердің тұрғындары үйлерін орталықтандырылған жылу жүйесіне қосу туралы өтініштерін айтты.
— Бұдан бұрын өткен кездесуімде де дәл осы мәселе айтылған болатын. Өзім аталған мекенжайға бірнеше рет барғанмын, жағдаймен таныспын. Қазіргі таңда Кирпичныйдағы көп қабатты тұрғын үйлерді орталықтандырылған жылу жүйесіне қосу үшін жобалық-сметалық құжаттама әзірленіп жатыр. Алдағы уақытта шешетін боламыз,-деп жауап берді бұл орайда қала әкімі.
Тұрғындар қоқыс шығаратын ұйымның жұмысына шағымданды.
— Бұл мәселені басқа да шеткі аудандардың тұрғындарынан естіп жатырмын. Тиісті сала мамандарына тапсырма бердім. Бұдан былай не қоқысты шығармаған мекемеге, немесе ақысын төлемейтін тұрғындарға айыппұл салынатын болады,- деді қала әкімі.
Жиналған халық аталған кенттерде балалардың ойын алаңдары жоқтығын да айтып, алдағы уақытта абаттандыру мәселесі қалай шешілетіндігі жайлы сұрады.
— Бұқаралық спортты дамыту мақсатында Школьная көшесінің бойында және №21 орта мектептің жанында воркаут тренажер алаңы орнатылады. Өздеріңіз білетіндей, 2022 жылы Кирпичный кентінде футбол алаңы мен балалар ойын алаңының құрылыс жұмыстары басталған болатын. Биыл футбол алаңы қолданысқа беріліп, әкімдіктің теңгеріміне қабылданады,- деді Нұрбол Төлегенұлы.
Жиын соңында шаһар басшысы көтерілген мәселелердің барлығы да жауапсыз қалмайтынын, кездесу қорытындысы бойынша проблемалық мәселелерді шешу жөніндегі іс-шаралар жоспары бекітілетінін айтты.
Қойылған сұрақтарыңыз өте орынды. Бірақ барлық жұмыстар кезең-кезеңімен жүзеге асады. Әкімдік тарапына келіп түскен барлық сұрақтар, ескертулер, ұсыныстар талданады, бірде-бір мәселе қараусыз қалмайды,- деді Нұрбол Нұрсағатов.
Айта кетейік, жиын басталмас бұрын қала әкімінің орынбасарлары және бөлім басшылары кент тұрғындарын жеке мәселелері бойынша қабылдап, заң аясында кеңес берді.
