28-ші қыркүйек — машинақұрастырушылар күні. Өткен жұма күні «Семей машина құрастыру зауытында» осыған орай салтанатты жиын өтті. Кездесуге қала басшысы Айбек Кәрімов, өндіріс орнының бас директоры Нұрлан Омаров, «Қазақстан инжиниринг» компаниясының басқарушы директоры Николай Поспелов пен кәсіп-орынның жұмысшылары қатысты.
Жиын барысында Машина құрастыру зауытының бас директоры Нұрлан Омаров сөз сөйледі. Өндіріс ошағы жұмысшыларын кәсіби мерекелерімен және кәсіпорынның 45 жылдық мерейтойымен құттықтап, жылы лебізін білдірді. Сондай-ақ, ол зауыттың алдағы уақыттағы жұмыс жоспары жайлы айтып өтті.
— Өндірілетін өнімнің түрлерін көбейту көзделіп отыр. Соның ішінде жеңіл және жүк көліктерін жасап шығару ойда бар. Одан бөлек спорт кешенін салуды жоспарлаудамыз. Бұл нысан зауытымыздың жұмысшыларымен қатар, маңайдағы ықшамаудандар тұрғындарының игілігіне қызмет етпек. Сондай-ақ, кәсіпорынымыздың жас мамандарына арналған көпқабатты үй тұрғызу қажеттілігі туындап отыр. Болашақта осы жоспарды жүзеге асырып, жақсы бір ғимаратты сатып алып, машина құрастырушылардың мәдениет үйін ашуды көздеудеміз. Яғни тоқсаныншы жылдары жіберілген олқылықтардың орнын толтырсақ деген ниеттеміз, — деді Нұрлан Срайылұлы. Кәсіпорын басшысының ауқымды жоспарлар жайлы мәлімет берілген сөзі зауыттың мәжіліс залына жиналған жұмысшылар тарапынан қызу қолдау тауып, қошеметке себепші болды.
{jcomments on}Содан кейін сөз кезегі қала әкімі Айбек Кәрімовке берілді. Қала басшысы жұмысшылар мен кәсіпорын ұжымын машина құрастырушылар күнімен құттықтап, өндіріс ошағының алдағы жұмысына жеміс тіледі. Сондай-ақ, Айбек Мүталапхан-ұлы зауыт басшылығының болашақта жүзеге асырылуы тиіс жоспарына қатысты пікірін білдірді.
— Біз бүгін кәсіпорынның қайта түлеп, екінші тынысының ашылып келе жатқанын сезінудеміз. Бұл тек қағаз жүзіндегі ғана мәліметтер емес. Қаламыздың экономикасын өндіріс саласын өркендету арқылы өрістетсек деп жоспарлап отырмыз, — дей келе, қала басшысы, – Сіздер шын мағынасында батыл жансыздар. Дегенмен өздеріңіз еңбек етіп отырған салада, осы саланың нарығында жеңімпаз атанып, бәсекелестікке қабілетті болу үшін зияткерлік пен білім жағынан озық болуларыңыз керек. Сонда ғана сіздер алдыңғы қатардан көріне аласыздар,- деп сөзін түйіндеді. Сондай-ақ, шаһар басшысы жұмысшыларға облыс әкімі Бердібек Сапарбаевтың құттықтауын жеткізіп, өндірісте белсенділігімен танылған машина құрастырушыларды грамоталармен марапаттады.
Сонымен қатар, «Қазақстан инжиниринг» ұлттық компаниясының басқарушы директоры Николай Поспелов те зауыт ұжымын кәсіби мерекемен құттықтады. Өзінің жылы лебізін жеткізгеннен кейін компания басшысы Болат Смағұловтың құттықтау сөзін оқып беріп, бірқатар жұмысшыларға «Самұрық – қазына» акционерлік қоғамының құрмет грамоталарын табыстады. Жиын соңында зауыт жұмысшыларының назарына кәсіпорынның көркемөнерпаздар ұжымы мен облыстық Әміре Қашаубаев атындағы Семей мемлекеттік филармониясының өнерпаздары әзірлеген мерекелік концерт ұсынылды.
Мирас ҚҰСАЙЫН, «Семей таңы»
