Рымбек Байсеитов атындағы Семей қаржы-экономикалық колледжінде орналасқан №91 сайлау учаскесінің шымылдығы түрілді. Алдымен әнұран шырқалып, кейін бюллетендер ашылды.
-Жалпы бүгінгі сайлауға толықтай дайынбыз. Қоғамдық бірлестіктерден, партиялардан бақылаушылар келіп, тіркеуден өткіздік. Біздің сайлау учаскемізде дауыс берушілердің саны 1349. 5 түрлі бюллетен бойынша дауыс беру жүргізіледі. Қабылданған бюллетендер саны 6810,-дейді 91 сайлау учаскесінің төрайымы Меруерт Мұхтарова.
Сайлау учаскесі ашыла салысымен ең алғашқы дауыс беруші де келді. Өз таңдауын жасағаннан кейін, дәстүр бойынша учаске төрайымы арнайы сыйлығын да табыстады.
Облыс мәртебесіне ие болған Семей жұртшылығы қай кезде де саясатқа бей-жәй қараған емес. Бұл жолғы сайлауда да белсенді болары анық.
