Маңғыстау облысы Ақтау қаласында 3 баласын өлтірген күдікті туралы ақпараттар белгілі болды. Оның Маңғыстау облысы Бейнеу ауданының тумасы екені анықталды, деп хабарлайды Семей таңы aikyn.kz ке сілтеме беріп.
Ауылдастары айыптыны салафилік бағытта болғанын алға тартты.
“Бейнеудегі Ыбырай Алтынсарин атындағы мектепте бірге оқыдық. Бүгінгі оқиғаны естіп ауылдастарымызбен бірге шошып отырмыз. Намазхан жігіт еді. Неліктен мұндай қадамға барғанын білмедік»,— деді ауылдасы.
Полиция департаменті күдіктіге қатысты әзірге басқа ақпараттарды жарияламады. Ал желіде үш баласын өлтірген азаматтың толық аты-жөні мен марқұм болған үш баласының есімі жария болды. 36 жастағы азаматтың бейресми ақпарат бойынша, екі қызы, кенже ұлы болған.
27-шағын ауданда көпқабатты үй пәтерінен 7, 9 және 12 жастағы балалардың мәйіті табылды. Күдіктінің 36 жастағы қала тұрғыны екені анықталды. Жантүршігерлік оқиға бойынша сотқа дейінгі тергеу жүріп жатыр. Алдын ала болжам бойынша, кісі өлтіру дерегі отбасы жанжалынан туындаған.
«2011, 2014 және 2016 жылы туған кәмелетке толмағандарды өлтірді деген күдік бойынша полиция қызметкерлері 36 жастағы әкесін ұстады. ҚР Қылмыстық кодексінің 99-бабы бойынша сотқа дейінгі тергеу амалдары басталды. Жедел-тергеу іс-шаралары жүргізіліп жатыр», — дейді қалалық ПД Ішкі және сыртқы коммуникациялар бөлімінің басшысы Әйгерім Ибадуллаева.
