27 наурыз — Халықаралық театр күні. Атаулы күн 1961 жылы Вена қаласында өткен ЮНЕСКО Халықаралық театр институтының IX конгресінде бекітіліп, 1962 жылдан бері тойланып келеді. Осы күнге орай Семей қалалық ішкі саясат бөлімінің қолдауымен, Жастар ресурстық орталығының ұйымдастыруымен дәстүрлі «Студент жастар театры — 2023» фестивалі өтті.
Зарина КӘП
«Семей таңы»
Театр – халықты эстетикалық адамгершілік пен ізгілікке тәрбиелеудің маңызды құралы. Жаңа есімдер, жаңа бейнелер, бір-біріне ұқсамайтын қойылымдар, фестивальдар мен премьералар — мұның бәрі бұрыннан бері келе жатқан қоғамның ажырамас бір бөлігі іспеттес.
— Бүгінгі шараны ұйымдастырып жатқан қалалық Жастар ресурстық орталығына алғысымыз шексіз. Бүгінгі қоғамда театрға қызығатын жастар аз. Осындай шаралар театр өнерін сүйетін жастардың қатарын көбейтері анық. Бұл фестивальға Мұқан Төлебаев атындағы музыкалық училищенің студенттерінен жасақталған «Ес-аймақ» театры «Қорғансыздың күні» қойылымын әзірлеп әкелді. Дайындыққа 3 ай уақыт кетті, осы уақыт ішінде студенттеріміз шыңдалды, әркім өз рөлін жақсы ойнап шығу үшін көп еңбектенді, сондықтан додаға сақадай-сай келдік деп айта аламын,- дейді М.Төлебаев атындағы музыкалық училищенің режиссер-педагогі Болат Қамзин.
Студент жастардың әртістік қабілетін, сахнадағы жүріс-тұрысын Абай атындағы театрдың режиссері Ербол Жүнісбек пен «Дариға-ай» жастар театрының актері Әділжан Серікқалиұлы бағалады.
— Қаламыздағы студент жастардан құралған театрлар арасындағы фестивальды Халықаралық театр күніне орай ұйымдастырып отырмыз. Біз сайыс ережелерін 3 ай бұрын жіберген болатынбыз. Содан бастап қызу дайындыққа кіріскен жастар бүгін өнер көрсетуде,- дейді Семей қаласының Жастар ресурстық орталығы директорының міндетін атқарушы Ерсінбек Өрлеубек.
Дәстүрлі түрде ұйымдастырылатын фестиваль биыл да жоғары деңгейде өтті. Қаламыздағы бірнеше жоғарғы оқу орындары мен колледждерінің студенттік театрлары бақтарын сынаған фестивальда Шәкәрім университетінің «Қарагөз» театры үздік деп танылды. Екінші орынды Құрылыс колледжінің «Шаңырақ» театры, үшінші орынды М.Төлебаев атындағы музыкалық училище мен М.Әуезов атындағы педагогикалық колледждің «Ес-аймақ» театрлары өзара бөлісті.
«Үздік режиссер» аталымын М.Әуезов атындағы педагогикалық колледж театрының режиссері Ислам Азизов, «Үздік ер адам рөлі» аталымын Шәкәрім университетінің студенті Мағауия Сұңғат, «Үздік әйел адам рөлі» М.Төлебаев атындағы музыкалық училищенің студенті Аружан Жұмабайқызы иеленді.
