Жалпыұлттық социал-демократиялық партиясы Үкімет басшысы лауазымына Әлихан Смайыловтың тағайындалуына қарсылық танытты деп хабарлайды Stan.kz ақпарат агенттігі.
“Бүгінгі кездесуде көтеріліп отырған сұрақ өте маңызды, тағдыршешті десек те болады. Сөз жоқ, біз сіздің 30 жыл бойы әбден былыққа батқан жүйені өзгертемін деген құлшынысыңызды көріп отырмыз. Бірақ, оны ертең жүзеге асыратын мемлекеттік аппарат, оның ішінде Үкімет екені анық. Күні кеше өзіңіз де болашақ Үкіметтің алдында бұрын-соңды болмаған ауқымды міндет қойдыңыз. Біз 20 жыл билікке оппозицияда жүріп, халқымыздың әл-ауқатының төмендеуіне Үкіметтің әлсіз әлеуметтік саясаты екендігіне көзіміз жетті. Ал енді бүгін аманаттықтар өз көпшілігін көрсетіп, ұсыныс беріп отыр. Әрине, парламенттік оппозиция ретінде біз ұсынысқа қарсымыз», – деді Мемлекет басшысы Қасым-Жомар Тоқаев қатысқан Мәжілістің жалпы отырысында ЖСДП фракциясының мүшесі Нұрлан Әуесбаев.
Мәжіліс отырысы аяқталған соң, кулуарда Нұрлан Әуесбаев үкімет толық жаңару керек екенін атап өтті.
“Үкімет түбегейлі жаңару керек. Әбден былыққа батқаны үшін тазаламай, біз алға ешқашан жылжымаймыз. Оны ашық айтуымыз керек. Елде жағдай өте ауыр. Қымбатшылық күннен-күнге үдеп бара жатыр. Халықтың күнкөру жағдайы төмендеп бара жатыр. Соның бәрі көре тұра, үкіметтің тірлігіне дұрыс баға бере алмаймыз. Ашық айтып жатырмыз ғой”, – деді ЖСДП депутаты.
Оның өзінше, елімізде іскер азаматтар жеткілікті.
