Бүгін Абай облысы мәслихатының сегізінші шақырылымының бірінші сессиясы өтті.
Сессия жұмысына Абай облысының әкімі Нұрлан Ұранхаев, облыс әкімінің орынбасарлары, облыстық аумақтық сайлау комиссиясының төрайымы Наталья Фесенко, мемлекеттік органдар мен ұйымдардың басшылары, құқық қорғау органдарының, бұқаралық ақпарат құралдарының, қоғамдық бірлестіктер мен облысымыздың партияларының өкілдері және жаңадан сайланған 28 депутат қатысты.
Күн тәртібінде Абай облысы мәслихатының төрағасын сайлау, мәслихаттың тұрақты комиссияларын құру, тұрақты комиссиялардың төрағаларын сайлау және депутаттық фракцияны тіркеу мәселелері қаралды.
Сессия барысында Н.Фесенко сайлау қорытындылары туралы баяндады.
Бірмандаттық аумақтық сайлау округтері бойынша 15 депутат сайланды. Партиялық тізім бойынша AMANAT партиясынан 13 депутат, Respublika партиясынан бір, «Қазақстан Халық партиясынан» бір депутат сайланды. Депутаттардың 6-ауы нәзік жандылар болса, 3-еуі 35 жасқа дейінгі жас. Жасы ең үлкені – 67 жаста.
Халық қалаулыларына төсбелгілер мен куәліктер тапсырылған соң Абай облысы мәслихатының төрағасы ретінде Қуаныш Сүлейменов сайланды. Тұрақты 5 комиссия құрылып, төрағалары бекітілді. Ел игілігі жолында ауқымды жұмыстар күтіп тұрғандығын тілге тиек еткен облыс әкімі Нұрлан Ұранханхаев сегізінші шақырылым депутаттарының жұмысына сәттілік тіледі.
Нұрлан Ұранхаев — Абай облысының әкімі — Бүгін облыстық мәслихаттың VIII шақырылымы алғаш бас қосып отыр. Сайлау нәтижесінде жеңіске жеткен барша депутаттарға, қызметіне табыс тілеп, алғашқы сессияның ашылуымен құттықтаймын! Жаңадан сайланған әр депутат мемлекетіміз бен қоғам алдындағы зор жауапкершілікті сезініп, ел мүддесін қорғауға адал қызмет жасайды деп сенемін. Бір жыл бұрын, Мемлекет басшысы саяси жаңғыру бағдарламасын ұсынды. Барлық бастамалар халқымыздың шынайы қолдауына ие болғанын, кеше, Парламент мінберінде Қасым-Жомарт Кемелұлы баса айтты. Саяси жаңғырулар легінде Депутаттардың да рөлі едәуір күшейді. Сайып келгенде, «Күшті Президент – ықпалды Парламент – есеп беретін Үкімет» қағидасына негізделген реформалар – мемлекетіміздің басты тірегіне айналды. Сол реформалардың негізінде Абай облысы құрылды. Халқымыз барлық саяси процестердің бел ортасында жүрді. Мен, ел тағдыры таразы басына алынған сәтте, тыс қалмай, саяси сауаты мен белсенділігін танытқан әр азаматқа шынайы ризашылығым мен алғысымды білдіремін!
Құрметті депутаттар!
Алдымызда, өздеріңізбен бірге қызмет жасап, шешілуі тиіс маңызды міндеттер тұр. Біз, Кешенді жоспар мен мемлекеттік бағдарламаларды негізге алып, облысымызды, жан-жақты жаңғырту жұмысын күшейтуіміз қажет. Әсіресе, әлеуметтік-экономикалық даму барысына тың серпін беретін жобаларға назар аудару маңызды! Ауызбіршілігімізді сақтап, аталы сөзге тоқтап, халықтың тұрмысын жақсарту! Облыстың экономикасы мен әлеуметтік саласында «ширек ғасыр» жиналып қалған түйткілдер бар. Оның барлығын ретке келтіру – ортақ міндетіміз! Жұмыс барысында тиімді әрі қажетті шешімдер қабылданып, пайдасын халық көреді деп сенемін! Баршаңызға толағай табыс тілеймін! Елдің жүгі, ұлт болашағы мен ұрпақ қамы үшін күш біріктіріп, Абай еліне лайықты қызмет жасайық!
Әйгерім СӘРСЕНҚАЛИ
