VIII шақырылымдағы Семей қаласы мәслихатының алғашқы сессиясы өтті.
Сессия отырысына Семей қаласының әкімі Нұрбол Нұрсағатов, Семей қаласының аумақтық сайлау комиссиясының төрағасы Зейнолла Тоқаев, қала әкімінің орынбасарлары, бөлім басшылары, жаңадан сайланған мәслихат депутаттары мен БАҚ өкілдері қатысты.
Фариза ТӘТТІМБЕТҚЫЗЫ,
«Семей таңы»
Сессия жұмысын ашқан Семей қаласы аумақтық сайлау комиссиясының төрағасы Зейнолла Тоқаев VIII шақырылымдағы қалалық мәслихат депутаттарына сәттілік тілеп, куәліктері мен төсбелгілерін тапсырды.
Аралас сайлау жүйесі бойынша сайланған 23 депутат VIII шақырылымдағы қалалық мәслихаттың бірінші сессиясында тұрақты комиссиялар бойынша бөлінді. Сессия барысында мәслихат төрағасы және жаңадан құрылған тұрақты комиссиялардың төрағалары сайланды. VIII шақырылымдағы Семей қаласы мәслихатының төрағасы болып депутаттардың бір ауыздан қолдауымен Данияр Шәкәрімов сайланды.
Семей қаласы әкімі Н.Нұрсағатов халық қалаулыларын құттықтап, ел игілігі жолындағы қоғамдық қызметтеріне сәттілік тіледі.
Депутаттық мандатқа ие болған азаматтардың орташа жасы 43-те. Ең жасы 25-те. ««AMANAT» партиясынан он бір, «Ақ жол», «ҚХП», «Respublika» партияларынан бір-бір депутаттан, тоғызы — өзін-өзі ұсыну арқылы сайланған. VIII шақырылым депутаттары ішінде алдыңғы құрамнан 4 депутат қайтадан мандат алған.
