Абай облысына ҚР Сауда және интеграция министрлігі Техникалық реттеу және метрология комитетінің төрағасы Қуаныш Елікбаев жұмыс сапарымен келді. Комитет төрағасы алдымен Семей қаласындағы «СемАз» жауапкершілігі шектеулі серіктестігінде болып, зауыттың жұмысымен танысты.
Зарина КӘП,
«Семей таңы»
2007 жылы ашылған ауыл шаруашылығы және жүк техникасын өндіруші «СемАз» зауытының бүгінде әлеуеті зор. Қазіргі таңда «ГАЗ» және «HINO» маркалы шағын тоннажды көліктер, «BELARUS» маркалы тракторлар мен «SHACMAN» және «DONGFENG» маркалы жүк көліктері, «ZHONGTONG» және «DONGFENG» автобустары, сондай-ақ «Урал» маркалы жол талғамайтын және арнайы мақсаттағы көліктер шығарылады. Екі ауысымда жұмыс істейтін зауыттың өндірістік қуаты да жоғары.
— Бүгін жұмыс сапарымен Абай облысына табан тіредік. «СемАз» кәсіпорнында болдық. Барлық түйткілді мәселелер айтылды. Оның ішінде техникалық реттеу, сертификаттау және сынақтан өткізу, экспорттауға қатысты сұрақтар көтерілді. Бүгінгі таңда бірқатар елдер төменгі экологиялық класты техникаларды қабылдауға дайын. Ол үшін еліміздегі сертификаттау мәселесін шешу керек. Бұл мәселе бойынша барлық шешімдерді қарастыратын боламыз,- деді Қуаныш Елікбаев.
«СемАз» кәсіпорнының жұмысымен танысқан Техникалық реттеу және метрология комитетінің төрағасы мекеменің жұмысына жоғары баға берді.
— Бұл — техниканың түр-түрін шығаратын үлкен кәсіпорын. Мұнда әр түрлі арнайы техникалар жасалады. Бүгін бұл кәсіпорынның қазақстандық аккумуляторлар сияқты компоненттерді қолдана бастағанын көрдік. Жақын арада отандық шиналарға көшу жоспарлануда. Дәнекерлеушілердің жұмысын, яғни автобус шанақтарының қалай дәнекерленетінін көрдік. Мұның өзі — үлкен жетістік. Жұмыс сапасы жоғары деңгейде деген сөз. Алдағы уақытта да табыстар тілеймін,- деді.
Мәртебелі мейман Семей қаласына арнайы келуінің себебін де айта кетті.
— Семей шаһарына келуіміздің өзіндік себебі бар. Биыл Қазақстан метрологиясына 100 жыл толады. Ал еліміздегі метрологияның даму ошағы осы Семей қаласы. 100 жыл ішінде елімізде орасан зор жұмыстар атқарылды. Бүгінгі таңда Қазақстанда жүзден астам стандартты техника, осы саладағы жетекші шетелдік ұйымдармен 70-тен астам келісімдер мен меморандумдар жасалған, Қазақстан — барлық негізгі халықаралық ұйымдардың мүшесі. Бұл — біз үшін үлкен жетістік,- деп түйіндеді сөзін ҚР Сауда және интеграция министрлігі Техникалық реттеу және метрология комитетінің төрағасы Қуаныш Нұрланұлы.
Осыдан соң Техникалық реттеу және метрология комитетінің басшысы Қуаныш Елікбаев жергілікті қауымдастықпен кездесті.
Абай облысы әкімдігінің және ірі кәсіпорындардың өкілдерімен кездесу барысында Қуаныш Елікбаев техникалық реттеу саласындағы өзекті мәселелерді жеткізіп, оларды шешу үшін өңірлік штаб құрылғанын айтты.
Абай облысы — техникалық реттеу саласындағы мәселелерді шешу мақсатында штаб құрылған санаулы өңірлердің бірі. Тарихи тұрғыдан алғанда, бұл кездейсоқтық емес, өйткені осыдан тура 100 жыл бұрын аспаптардың өлшеуге жарамдылығын анықтау мақсатында Омбы тексеру палатасының Семей бөлімшесі ашылды. Осы күннен бастап отандық метрологияның қалыптасуы мен дамуы басталды.
– Техникалық реттеу мәселелерін шешу үшін біз өңірлік штаб құрдық. Бұрын мұндай штабтар өңірлерде жұмыс істеген, бірақ кейіннен таратылды. Басты мақсат – стандарттау, техникалық реттеу мәселелерімен жұмыс істейтін барлық шаруашылық жүргізуші субъектілерді біріктіріп, ортақ талқылаудан кейін орталық мемлекеттік органдарға өз мүдделерімізді жеткізу. Бұл мамандандырылған ашық алаң жиі ұйымдастырылатын болады, – деді Абай облысы әкімінің бірінші орынбасары Айдын Кәрімов.
Өңірлік штабқа мемлекеттік органдардың, ірі бизнес өкілдерінің, «Атамекен» ҰКП-ның және басқа да мекемелердің өкілдері енген.
Комитет басшысы Қуаныш Елікбаев тұрғындарды аттракциондар мен ойын алаңдарының қауіпсіздігі секілді өзекті мәселелер көп алаңдататынын атап өтті.
— Біздің бастамамыз бойынша Үкімет қаулысымен жергілікті атқарушы органдарға балалардың қауіпсіздігін қамтамасыз ету мақсатында мемлекеттік бақылауды жүзеге асыру жүктелді. Елімізде мұндай нысандарда балалардың өмірі мен денсаулығына қауіп төнетін жағдайлары жиі кездеседі. Біздің міндетіміз — барлық деңгейдегі әкімдіктерге осындай нысандарға жауапкершілік пен бақылауды арттырып, нақты тапсырмалар жүктеу, — деп атап өтті Қуаныш Елікбаев.
Техникалық реттеу және метрология комитетінің басшысы сондай-ақ азаматтардың қауіпсіздігін қамтамасыз ету үшін енгізілген жаңа талаптар туралы және олардың орындалуын бақылау қажеттілігі туралы айтып өтті. ЕЭО аясында талаптар үнемі жетілдіріліп, жаңа нұсқалар енгізіліп отыратыны белгілі.
Мысалы, 2023 жылдың 1 қаңтарынан бастап құс етіне және оны қайта өңдеу өнімдеріне жаңа техникалық регламент енгізілді. Онда құс етін сумен және басқа да қоспалармен араластырмау туралы шарт бар. Сонымен қатар тексеруден өтпеген құрылғыларды пайдалану фактілері көп анықталып, кейбір кәсіпорындар мен денсаулық сақтау мекемелеріне айыппұл салынған.
Кездесу барысында бизнес өкілдері мен тұрғындар тарапынан қойылған сауалдарға жауаптар берілді.
Жиыннан соң комитет басшысы азаматтарды жеке қабылдады.
