Биыл «Аграрлық несие корпорациясы» АҚ-ның Абай облысы бойынша филиалына үш несиелік бағдарламаға 8 млрд теңге қаражат бөлінген. Бұл туралы «Аграрлық несие корпорациясы» АҚ-ның Абай облысы бойынша филиалы директорының міндетін атқарушы Мирас Қалиев өңірлік коммуникациялар қызметінде өткен баспасөз мәслихатында айтып берді.
Жадыра ТӨЛЕГЕНҚЫЗЫ,
«Семей таңы»
— Көктемгі егін және жинау жұмыстары үшін несие беруге бағытталған «Кең дала» бағдарламасы арқылы биылғы жылға 1 млрд 300 мың теңге қарастырылып отыр. Бүгінгі күні оның 600 млн теңгесі игеріліп, 25 несие берілді,- деді М.Қалиев.
Ал «Агробизнес» бағдарламасы аясында 2023 жылға 5 млрд теңге бөлініпті. Бұл несиелер құрал-жабдықтар мен мал сатып алуға беріледі.
— Бастапқы және жұмыс істеп тұрған бизнесті дамытуға арналған «Іскер» бағдарламасы бойынша өткен жылы 1 млрд 965 мың теңге бөлінді. Бүгінгі күнге дейін 1 млрд 165 мың теңгесі игеріліп, 247 шағын несие берілді. Несиелер жылдық 6 пайызбен беріледі,- деді Мирас Қалиев.
Айта кетейік, «Аграрлық несие корпорациясы» АҚ-ның Абай облысы бойынша филиалы өткен жылдың қараша айында ашылды. Негізгі бағыты – агроөнеркәсіп кешен саласындағы шаруаларға жеңілдетілген несиелер беру арқылы саланы дамыту.
Сонымен қатар 2023 жылдың 1 наурызынан бастап елімізде 21-35 аралығындағы жастарға 5 млн теңгеге дейін жеңілдетілген шағын несие беру бағдарламасы іске қосылды. Абай облысы бойынша бұл бағытта 1,055 млрд теңге бөлінген. Мирас Қалиев атап өткендей, бағдарламаға өтініш берушілердің жеке кәсіпкер ретінде тіркелгендеріне 5 жылдан аспауы керек.
— Несие мерзімі — 5 жылға, мал шаруашылығы саласы үшін 7 жылға дейін. Несие мерзімінің 1/3 кезеңінен аспайтын уақытқа демалыс алу мүмкіндігі қарастырылған. Сыйақы мөлшерлемесі — жылдық 2,5 пайыз. Сондай-ақ кепілзат болуы міндетті. Егер үміткердің өзінде кепіл болмаса, ата-анасының немесе өзге де туысқандарының мүліктерін кепілге қоюға болады,- деді М.Қалиев.
«Аграрлық несие корпорациясы» АҚ сенімді өкіл ретінде аталған бағдарлама бойынша 1 наурыздан бастап өтініш қабылдауды бастады. Бүгінгі күнге дейін 15 өтініш қабылданған.
— Қазір өтініштер қабылданып, жастарға кеңестер берілуде. Нақты шешімін әкімдік жанынан құрылған облыстық комиссия шығарады. Комиссия құрамына мәслихат депутаттары, мемлекеттік органдардың, «Атамекен» ҰКП, БАҚ өкілдері, кәсіпкерлер және басқа да тұлғалар енді. Үміткерлер жобасын осы комиссия алдында қорғайды. Комиссия жобаның өзектілігіне, экономикалық маңыздылына назар аударады,- деді Мирас Қалиев.
