Семей қаласында Абай облысы білім басқармасының «Инновациялық-әдістемелік орталығы» және «КазРоботикс» қазақстандық білім беру және спорттық робототехника федерациясы» республикалық қоғамдық бірлестігінің ұйымдастыруымен «RoboBalapan — 2023» республикалық балалар шығармашылығы фестивалінің облыстық кезеңі өтті.
Зарина КӘП,
«Семей таңы»
Шараның мақсаты балалар мен ересектер арасында робототехника саласын насихаттау, оқушылардың робот техникасына қызығушылығын арттыру, балалар мен олардың ата-аналарын бірлескен шығармашылық жұмысқа ынталандыру, өскелең ұрпақтың үйлесімді дамуына қолайлы орта қалыптастыруда отбасы мен педагогтер одағының рөлін арттыру.
— ХХІ ғасырда өркениет көшінен қалмау үшін заманауи технологиялық үдерісті дер кезінде енгізіп отыру керек. Әсіресе робот технологияны меңгеру маңызды. Қазіргі таңда Қазақстанның әр өңірінде турнирлер өткізіп, өз идеяларымызды іске асырып келеміз. Түрлі ұйымдармен байланысып, еліміздегі талантты жастардың бойындағы дарынын ашып, ары қарай жетілдіруге атсалысудамыз, — дейді ҚР Білім беру және спорттық робототехника федерациясының Президенті Айжан Жекеева.
Фестивальға 5-6 жас аралығындағы мектепке дейінгі білім беру ұйымдарының білім алушылары, ата-аналары, педагог-жетекшілерінен құралған 11 команда қатысты. Командалар үш тапсырма бойынша сайысқа түсті.
— Қазір кішкентай балалардың бәрі телефонға, роботқа үйір ғой. Менің баламның да робототехникаға қызығушылығы бар. Осы фестиваль болатынын естіген соң, екеуіміз бірлесіп құрылыс саласына арналған автономды екі робот жасап әкелдік,- дейді жетекші әрі ата-ана Еділ Әділғазы.
Фестиваль қорытындысында І орынды Абай ауданындағы Абай атындағы мамандандырылған мектеп-гимназия интернатының «Intellect» тобы және Семей қаласындағы №4 Балдәурен бөбекжайының «Балдәурен» тобы жеңіп алды. ІІ орынға Жарма ауданының Абай атындағы мектеп-балабақшасының «Robotics» тобы және Бородулиха ауданының Н.Островский атындағы орта мектебінің «Фиксики» тобы ие болды. ІІІ орынды Бесқарағай ауданы Өндіріс орта мектебінің «I-robot» тобы және Көкпекті ауданы Көкпекті орта мектебінің «Юный техник» тобы еншіледі.
Барлық қатысушыларға сыйлықтар табыстылып, жеңімпаз командалар «ҚазРоботикс» федерациясының дипломдарымен және медальдарымен марапатталды. Үздік командалар фестивальдың республикалық кезеңінде облысымыздың намысын қорғайтын болады.
