Елімізде жас ұрпақтың тәрбиесі мен білім-білігін дұрыс жолға қою жолында білім саласына үлкен өзгерістер енгізіліп, ұстаздардың кәсіби деңгейі мен біліктілігін үздіксіз жетілдіруге үлкен көңіл бөлінуде. Себебі ел болашағы білімді ұрпақтың қолында. Ал оқушылардың сапалы білім алуы тікелей ұстаздарға байланысты. Тек білікті педагог қана білімді шәкірт тәрбиелей алады.
Зарина КӘП,
«Семей таңы»
Осыған орай, жас ұстаздардың әлеуметтік мәртебесін және шығармашылық потенциалын арттыру, кәсіби шеберліктерін жетілдіруіне одан әрі жағдай жасау мақсатында білім жетілдіру курстары, семинарлар мен байқаулар жиі өткізіледі. Мысалы, «Жаңа мектепке — жаңашыл ұстаз» республикалық байқауы биыл алтыншы рет ұйымдастырылып отыр.
Абай облысы білім басқармасының ұйымдастыруымен өткен дәстүрлі байқаудың облыстық кезеңіне Абай, Ақсуат, Аягөз, Бесқарағай, Бородулиха, Жарма, Көкпекті, Үржар аудандары мен Курчатов, Семей қалаларынан үш жылға дейін педагогикалық еңбек өтілі бар 13 жас маман қатысты.
— Менің педагогикалық еңбек өтілім — бір жарым жыл. Осы уақыт аралығында көп ізденіп, білім саласындағы жаңашылдықтарды, оқытудың қыр-сырын меңгеруге тырыстым, аз да болса тәжірибе жинақтадым деп ойлаймын. Соның арқасында болар, аудандық байқауға қатысқан 10-нан астам жас маманның арасында жеңімпаз атандым. Бүгін облыстық кезеңде ауданымыздың намысын қорғайтын боламын,- дейді Абай ауданы Кеңгірбай би ауылындағы Шәкәрім орта мектебінің информатика пәні мұғалімі Жансая Саятбекова.
Байқау үш кезеңнен тұрды. Алғашқы, таныстыру кезеңінің тапсырмасын жас мамандар креативті ойларымен, жаңашыл идеяларымен ерекшеленіп, бір-бірінен қалыспай орындаса, педагогикалық жағдаяттарды шешу кезеңінде мүдіріп жатқандары да болды. Ал үшінші кезеңде қатысушылардан алдын ала қабылданған эссе жұмыстары мен бейнесабақтары бағаланды.
— Бүгінгі күні облыс мектептерінде 720 жас маман еңбек етіп жатыр. Соның ішінде 116 педагогтің бір жылдық еңбек өтілі бар. «Ақыл — жастан, асыл — тастан» дейді дана халқымыз. Біз сіздердің шығармашылық әлеуеттеріңізді көру үшін, кәсіби шеберліктеріңізді арттырып, әлеуметтік орта қалыптастыру үшін осындай шаралар ұйымдастырып келеміз. Бүгінгі байқау республика бойынша алтыншы рет өткізілуде. Алдымен мектепте, сосын ауданда өтеді. Бүгін байқаудың облыстық кезеңіне қатысып отырған бәріңіз де жеңімпазсыздар. Енді араларыңыздан оза шапқан нағыз дүлдүл республикалық байқауда облыс намысын қорғайтын болады, — деді Облыстық инновациялық-әдістемелік орталығының директоры Айнұр Исабаева.
Байқау қорытындысы бойынша, Семей қаласы облыстық дарынды балаларға арналған мамандандырылған Білім-Инновация лицейінің мұғалімі Ж.Нәубетов жеңімпаз атанды, ІІ орынды Бородулиха ауданы Ә.Бөкейханов атындағы қазақ орта мектебінің мұғалімі Ж.Сағдатова, ІІІ орынды Ақсуат ауданы М.Әуезов атындағы Көкжыра орта мектебінің ұстазы М.Еркінов иеленді.
