Семей қаласындағы №44 жалпы орта білім беретін мектепте «Формативті бағалаудың орыс тілі мен әдебиеті сабақтарында оқушылардың іс-әрекетін белсендіруге әсері» атты орыс тілі мен әдебиеті пәні мұғалімдеріне арналған қалалық семинар өтті.
Зарина КӘП,
«Семей таңы»
Семинардың мақсаты мұғалімге бағалаудың заманауи әдістерін меңгеруге, сабақта бағалау үдерісін жақсарту жолын түсінуге ықпал ету.
— Бүгін мектебімізде орыс тілі мен әдебиеті пәні мұғалімдеріне арналған қалалық семинар өтті. Мұғалімдеріміз ашық сабақтар мен тренингтер өткізіп, өз тәжірибелерін бөлісуге тырысты. Формативті бағалау білім беру жүйесінің маңызды бөлігі болып саналады. Оны мұғалімдер арасында да қолдану аясын кеңейтіп, жаңа тәсілдерімен алмасу үшін осы семинарды ұйымдастырдық,- дейді директордың ғылыми-әдістемелік жұмыс жөніндегі орынбасары Әлия Түнғатарова.
Семинарға Семей қаласының барлық мектептерінен 60-қа жуық педагог қатысты. Мұғалімдер ұйымдастырушылар тарапынан дайындалған бағдарлама арқылы №44 мектеп ұстаздарының бірнеше ашық сабақтарына, шеберлік сағаттарына қатысып, жаңа әдістемені, білім беру жүйесіндегі жаңашылдықтарды қолданудағы артықшылықтарға көз жеткізді.
— Бүгінгі семинардың мен үшін әдістемелік тұрғыда пайдасы зор болды. Тың идеялармен танысып, көп мағлұмат алдық. Алдағы уақытта өзімнің сабақтарымда да осы семинарда үйренген әдіс-тәсілдерді пайдаланатын боламын,- дейді №20 мектептің орыс тілі пәні мұғалімі Рита Дүйсембаева.
