Абай өңірлік коммуникациялар қызметінде өткен баспасөз мәслихатында бос жатқан және заңсыз алынған жерлерді мемлекетке қайтару бағытында атқарылып жатқан жұмыстар туралы Абай облысының жер ресурстарын басқару департаментінің басшысы Дәулет Бижанов баяндап берді.
Мұхтар СОВЕТЖАНОВ,
«Семей таңы»
Әріден келе жатқан жер дауы әлі де бітер емес. Мемлекет басшысының тапсырмасымен елімізде пайдаланылмай жатқан және заңсыз берілген жерлер біртіндеп мемлекет меншігіне қайтарылуда. Игерілмей қалған және бос жатқан жерлер Қазақстанның барлық өңірлеріндегі секілді біздің облыста да бар. Жерді қайтару бір-ақ күнде шешіле қоятын мәселе емес, дегенмен қазірдің өзінде Абай облысы бойынша 2022 жылға жоспарланған 200,0 мың гектар жердің 84,7 мың гектары мемлекет иелігіне қайтарылыпты.
Нақты айтар болсақ, Абай ауданында 12,3 мың, Аягөз ауданында 27,9 мың, Үржар ауданында 24,2 мың, Жарма ауданында 5,4 мың, Бесқарағай ауданында 5,3 мың, Семей қаласында 4,7 мың, Көкпекті ауданында 4,3 мың гектар аумақты құрайтын бос жатқан жерлер мемлекет меншігіне өткен екен.
— Мемлекет басшысының тапсырмасы аясында және Қазақстан Республикасының Жер кодексіне еңгізілген соңғы өзгерістер бойынша бұл бағыттағы жұмыстарды бастап кеттік. Әрине, бірінші кезекте бізге жүктелген тапсырма — бос жатқан жерлерге бақылау жүргізу, сараптама жасау. Егер де жер иесі үш жылдан артық егін екпеген болса, мал шаруашылығымен айналыспаса, бірден тартып алмай, заңнама бойынша ескерту жасап, 1 жылға дейін уақыт береміз. Егер сол аралықта жер игерілмесе, мемлекет қарамағына қайтарылады,- деді Абай облысының жер ресурстарын басқару департаментінің басшысы Дәулет Ерназарұлы.
Жиында айтылғандай, биыл, Президент тапсырмасына сәйкес, республика бойынша пайдаланылмай жатқан 5 млн гектар жерді мемлекетке қайтару көзделіп отыр. Оның ішінде жалпы алаңы 250,0 мың гектарды құрайтын жер біздің облысымызға тиесілі. Жыл басынан бергі атқарылған жұмыстардың нәтижесінде сол 250,0 мың гектардың 38 пайызы мемлекетке қайтарылған.
Жер ресурстарын басқару департаменті басшысының мәліметінше, өткен жылы ескерту алған кәсіпкерлер ешқандай нәтиже шығармаса, ауыл шаруашылығы мақсатындағы 35,7 мың гектар жерді сот арқылы мемлекет меншігіне мәжбүрлеп қайтару жоспарлануда.
Сонымен қатар жоспардан тыс тексеру нәтижесінде Абай облысының жер ресурстарын басқару департаментінің қызметкерлері жерді заңсыз пайдаланып отырған азаматтарға қатысты 9 заң бұзушылықты анықтаған. Атап айтсақ, мемлекет меншігіндегі жерді заңсыз иемдену, жалға алу мерзімінен кейін де пайдалану сынды фактілер тіркелген.
— Ауыл шаруашылығы мақсатында пайдаланылмай отырған жер учаскелері бойынша тиісті құжаттар келіп түскен жағдайда, қолданыстағы Жер және Кәсіпкерлік кодекстерінің талаптарына сәйкес тексеру жұмыстары жүргізіледі,- деді жер ресурстарын басқару департаментінің басшысы Дәулет Бижанов.
Айта кетейік, Абай облысының жер ресурстарын басқару департаментінде 12 маман жұмыс істейді. Оның ішінде 8 мемлекеттік инспектор бар.
