Абай облысының өңірлік коммуникациялар қызметінде өткен баспасөз мәслихатында Абай облысының Кәсіпкерлер палатасы төрағасының міндетін атқарушы Әлия Жүрсімбаева атап өткендей, жыл басынан бері облыста 72 кәсіпкердің құқығы қорғалған.
Жадыра ТӨЛЕГЕНҚЫЗЫ,
«Семей таңы»
— Кәсіпкерлерден, негізінен, мемлекеттік сатып алулар және оларды өткізу рәсімі, тапсырыс беруші тарапынан шарттық қатынастарды орындамау, салықтық әкімшілендіру, жерді пайдалану, кеден мәселелері бойынша шағымдар келіп түседі, — деп атап өтті Әлия Жүрсімбаева.
Оның айтуынша, Аймауытов көшесіндегі жер асты өткелінде жұмыс істейтін кәсіпкерлер палатаға ұжымдық өтініш білдірудің нәтижесінде өз құқықтарын қорғап қалған.
— Қалалық жолаушылар көлігі және автомобиль жолдары бөлімі Аймауытов көшесіндегі кәсіпкерлерге жер асты өткелдеріндегі сауда алаңдарын босату туралы хабарламалар жіберген. Біздің тарапымыздан қабылданған шаралардан кейін мемлекеттік органның хабарламаларының заңсыз екендігі дәлелденді. Нәтижесінде мемлекеттік органның хабарламалары кері қайтарылып, кәсіпкерлер өз орындарында қалды, — деді Әлия Жүрсімбаева.
Палатаның негізгі қызмет түрлерінің бірі — кәсіпкерлерге кеңес беру, көмек көрсету. Мысалы, кәсіпкерлікті қаржылай емес қолдау бойынша 2023 жылдың I тоқсанында 172 қызмет, барлығы 1436 ақпараттық-кеңес қызметі көрсетілген.
— Шағын және орта бизнес өкілдері арасында мемлекет қолдауы және кәсіпкерлікті дамыту шаралары туралы ақпараттық-түсіндіру жұмыстары жүргізілуде. Қазіргі уақытта біз 214,2 млн теңгені құрайтын 44 жоба бойынша жұмыс істейміз, оның ішінде 59,4 млн теңгеге 10 жоба іске асырылды. Сондай-ақ «Аграрлық кредиттік корпорация» АҚ арқылы 45 млн теңгеге бір кредит беру жобасы іске асырылды. Бизнес жобаларды іске асыру барысында проблемалық мәселелер туындаған жоқ, — деді Әлия Жүрсімбаева.
Сонымен қатар кәсіпкерлер палатасы төрағасының міндетін атқарушы жаз мезгілінде Семей қаласында алғаш рет «Қазақстанның үздік тауары» байқауы өтетінін хабарлады.
