Биыл облыста 235 шақырым жол жөнделеді. Осы мақсатқа 9,9 млрд теңге бөлінді. Бұл туралы Абай облысының Өңірлік коммуникациялар қызметінде облыстық жолаушылар көлігі және автомобиль жолдары басқармасының басшысы Асылбек Нұғмановтың қатысуымен өткен баспасөз мәслихатында айтылды.
Жадыра ТӨЛЕГЕНҚЫЗЫ,
«Semeı tańy»
Асылбек Нұғмановтың айтуынша, жөндеу жұмыстары облыстық маңызы бар жолдарда, сондай-ақ Семей қаласының көшелерінде жүргізіледі.
– Жалпы ұзындығы 235,2 шақырым болатын 35 учаскені орташа жөндеу күтілуде. Сондай-ақ «Ауыл – Ел бесігі» мемлекеттік бағдарламасы аясында 33 жобаны жүзеге асыруға, жалпы ұзындығы 77,4 шақырым болатын жолдарды жөндеуге 2,5 миллиард теңге көлемінде қаражат бөлінді. Бүгінгі күні орташа жөндеудің барлық жобалары бойынша конкурстық процедуралар аяқталуға жақын. Құрылыс-монтаж жұмыстарын мамыр айында бастап, қыркүйек айының соңына дейін аяқтау жоспарлануда,- деді Асылбек Нұғманов.
Сонымен қатар Семей қаласында 2023 жылы жалпы ұзындығы 50 шақырымды құрайтын 32 көше жолын орташа жөндеуден өткізу жоспарлануда. Қазіргі уақытта мердігер ұйымды анықтау бойынша 4 млрд теңгеге мемлекеттік сатып алудың конкурстық рәсімдері жүргізілуде. Сондай-ақ 200 млн теңге қаржыға 10 шақырым жолға құм мен қиыршық тас төсеп, қалыпқа келтіру көзделіп отыр. Мердігер ұйымды анықтау бойынша конкурстық мемлекеттік сатып алу рәсімдері аяқталған жоқ.
– Кварталішілік жолдарды асфальттауға 485,5 млн теңге қарастырылған, жолдардың ұзындығы 6,8 шақырымды құрайды. Қазіргі уақытта конкурстық рәсімдер өткізілуде. Жарқын, Малая Актюба, Верхне-Березовский, Қыземшек, Шаған ауылдарының кіреберіс жолдарын орташа жөндеуге облыстық бюджеттен 595 миллион теңге қаражат бөлінді. Жөнделетін жолдардың жалпы ұзындығы — 13 шақырым. Сонымен қатар «Ауыл — Ел бесігі» бағдарламасы аясында Көкентау ауылындағы 2,2 шақырымдық Майтқанова көшесін орташа жөндеуден өткізуге қаражат бөлінді, — деді Асылбек Нұғманов.
Ертіс өзені арқылы өтетін аспалы көпірді күтіп-ұстау үшін «Семей жолдары» ЖШС мердігер компаниясымен 143 млн теңгеге келісімшарт жасалған. Осы келісім аясында кеуекті мастикалық асфальтбетон-10 қоспасын қолдану арқылы көлемі 4000 шаршы метр болатын жолды ағымдағы жөндеуден өткізу жоспарлануда. Аспалы көпірді күтіп-ұстауға сондай-ақ күзет, камералар жұмысын бақылау, лифт жабдықтарына техникалық қызмет көрсету, металл конструкцияларды жөндеу, жуу және сырлау жұмыстары кіреді.
