Мүгедектігі бар жандарды қолдау – мемлекет алдындағы басты міндеттердің бірі. Бұл орайда елімізде қайырымдылық мақсатын көздеген көптеген қорлар бар. Олар қолдауды қажет ететін жандарға демеу болатын әр түрлі жобаларды жүзеге асыруда.
Өткен аптада көру қабілеті бұзылған балаларды қолдау көрсетуді, әлеуметтік бейімдеуді мақсат еткен «United Charity Projects Evolution» қоғамдық қоры Семей қаласындағы № 3 арнайы мектеп-интернатына құны 21 млн теңге тұратын көмекші жабдықтар мен техникалық құралдарды сыйға тартты.
Әйгерім Сәрсенқали,
«Semeı tańy»
Көздері нашар көретін балаларға оқу материалын тиімді игеру үшін тифлоқұралдар, брайль жазбасымен шыққан кітаптар, тактильді тақтайшалар және еден плиткалары сынды көмекші жабдықтар тарту етілді.
Қордың президенті Георгий Сосновский мектептің материалдық-техникалық базасымен танысып, бұл игі іспен шектелмей, көздерінде ауыр патологиясы бар балаларды емдеуге және ота жасатуға көмек көрсетіндерін атап өтті.
Арнайы мектеп-интернат оқушыларының музыкалық қойылымдарын тамашалаған қоғамдық қордың өкілдері балаларға лебіздерін білдірді.
Іргетасы 1979 жылы қаланған мектеп-интернатта бүгінде 150 оқушы тәрбиеленуде. Мектеп-интернат ұжымының басты мақсаты – көрмейтін және нашар көретін балалардың қазіргі заманға сай білім алуына жағдай жасау, оларға осы қоғамда өзінің орнын табуға көмектесу. Қайырымдылық қоры сыйлаған құрылғылар мен жабдықтар балалардың оқу үрдісіне оң әсерін тигізетіні анық. Мәселен, мектеп директоры Акрам Қалиғожиннің айтуынша, тифлоқұрылғылар көру қабілеті шектеулі адамның табиғи қажеттілігін толтырады және дамытады, оның басқа адамдармен тең дәрежеде жан-жақты дамуына көмектеседі. Ерекше балалардың білім көкжиегін кеңейтуге, өмірді танып-білулеріне септігін тигізетін мұндай тифлоқұралдар аса қажет.
Арнайы мектеп-интернат, балаларға білім берумен бірге, олардың шығармашылық әлеуеттерін арттыруға да көңіл бөледі.
— Балаларымыз білім мен өнерден кенде емес. Көптеген конкурс, фестивальдардың жеңімпаздары. Мүмкіндіктері шектеулі балаларға арналған халықаралық дәстүрлі «Жұлдызай» фестивалінде былтыр «Сырғалым» жетігеншілер тобы Гран-при жүлдесін ұтып алды. Бұл фестивальда оқушыларымыз жыл сайын әр түрлі номинациялар бойынша жүлдегер атанып жүр. Өткен жылы өнерпаздарымыз Түркістан қаласына, Өзбекстан мен Қызғыстан, Түркия елдеріне барып, көркемсөз оқу, ән, би жанры бойынша Гран-при мен І орынды жеңіп алды. Тоғызқұмалақ, асық ату сынды қазақтың ұлттық ойындарын насихаттауға ерекше көңіл бөлінеді. Біздің тоғызқұмалақшылар облыстың құрама командасының қатарына енген,- деп атап өтті мектеп басшылығы.
