Семейде сәуір айының басынан бері «Таза Табиғат» акциясы және көктемгі экологиялық екі айлық аясында әр апта сайын сенбіліктер өтуде.
Әйгерім СӘРСЕНҚАЛИ
Өткен сенбі күні Семей қаласының дене шынықтыру және спорт бөлімінің қызметкерлері мен аға жаттықтырушылар қалалық ипподром аумағын қоқыстан тазартты. Сенбілікке қатысушылар бірнеше сағат ішінде 20 текше метрден астам қоқыс жинады.
Бұл күні жуырда құрылған жастар мәслихатының депутаттары да белсенділік танытып, сенбілікке шықты. Автокөлік көпір аумағын тазартқан жастар бұл игі істі әлі де жалғастыра бермек.
Жалпы, тазалық мәселесі қашанда өзекті. Семей қаласының әкімдігі экологиялық екі айлық аясында рұқсат етілмеген қоқыстарды шығару бойынша жұмыстарды әлі де жалғастыруда. Қазіргі күні қаланың шеткі аудандарында 30 жылдан астам уақыттан бері жиналған қоқыс үйінділерін жою жұмыстары жүргізілуде. Қоқыс үйінділерінің өте көп болуына байланысты тазарту жұмыстары тұрақты түрде жүргізілуде.
Өткен аптада Шығыс, Кирпичный, Степной, Березовский, Суық бұлақ кенттерінде де сенбілік өтті. Санитарлық тазалау жұмыстары барысында Шығыс кентінде 80 текше метрден астам, Кирпичный кентінде 300 текше метр, Степной кентінде 200 текше метр, Березовский кентінде 200 текше метр, Суық бұлақ кентінде 100 текше метр қоқыс шығарылды. Жалпы, 20 бірлік коммуналдық техниканың көмегімен қаланың шет аймақтарынан барлығы 880 текше метр қоқыс шығарылды.
Шеткі аумақтардың ұзақ жылдар бойы жиналған қоқыс үйінділерінен тазартылып жатқанына разы болған жергілікті тұрғындар алғыстарын жаудыруда.
— Қала басшылығына алғыс айтамыз, қанша жылдан бері жиналған қатты қалдықты тазартуға техника бөліп, қоқыс шығарылып жатыр. Қаламыз көркейе берсін!- дейді Шығыс кентінің тұрғындары.
Степнойлықтар да қала тазалығын сақтау әр тұрғынның міндеті екенін айтады.
— Бүгін қала әкімдігі тарапынан жарияланған екі айлық аясында, ауа райының қолайсыздығына қарамастан, сенбілікке шықтық. Шынтуайтына келгенде, осы күл-қоқыстың жиналуына басты себепкер – жергілікті тұрғындардың өздері. Тазалықта өмір сүру үшін әуелі әр адам өз ауласын, үйінің айналасын қоқыстан арылту керек қой, қоқысты қалай болса, солай тастай салып жүре беретіндер де бар. Бұған жол бермеу керек,- дейді олар.
Естеріңізге сала кетейік, егер санитарлық тәртіп бұзушылыққа куә болсаңыз — жекелеген тұрғындардың белгіленбеген жерлерге қоқыстарды лақтырғанын не өзге де тәртіп бұзушылықтарды (аялдамалардың орындықтарын, әйнектерін, қоршауларды сындыру т.б.) көрсеңіз, суретке түсіріп алып, фотосуретті Семей қаласы әкімдігіне жолдаңыз. Сол ақпарат бойынша тиісті шаралар қолданылатын болады.
Қаламыздың тазалығы — бәрімізге сын. Шаһарымыздың таза әрі әдемі болуы әрбір тұрғынның сүйіспеншілігі мен жанашырлығын қажет етеді. Тазалыққа әрбіріміз жауаптымыз. Сондықтан екі айлық акцияға белсене қатысайық!
