Бейсенбі, 20 сәуір күні Абай облысы мәслихатының кезектен тыс, екінші сессиясы өтті. Сессия жұмысына облыс әкімінің орынбасары Шалқар Байбеков, облыстық мәслихат хатшысы Қуаныш Сүлейменов және депутаттар, басқарма басшылары мен құзырлы органдардың өкілдері қатысты. Күн тәртібінде 13 мәселе қаралды.
Әйгерім СӘРСЕНҚАЛИҚЫЗЫ,
«Семей таңы»
Күн тәртібіндегі бірінші мәселе — Абай облысы мәслихатының «2023-2025 жылдарға арналған облыстық бюджет туралы» шешіміне өзгерістер енгізу жайлы облыстық экономика және бюджеттік жоспарлау басқармасының басшысы Роза Құдайбергенқызы баяндама жасады. Депутаттар корпусы әлеуметтік жобаларды жүзеге асыру мақсатында бюджетке енгізуге ұсынылған өзгерістерді бір ауыздан қолдады.
Келесі кезекте жергілікті атқарушы және өкілді органдардың қызметкерлеріне тұрғын үйді жалға алу бойынша шығыстарды өтеуге арналған төлемдерді қамтамасыз ету мәселесі талқыланды. Баяндама жасаған Абай облысы әкімі аппаратының қаржы-шаруашылық бөлімінің басшысы – бас есепші Нәзигүл Искакованың айтуынша, жаңа облыс құрылып, кадр тапшылығы орын алған сәтте әр өңірден мемлекеттік қызметкерлер шақырылып, конкурстық рәсіммен жұмысқа қабылданған. Баспанасы жоқ 119 мемлекеттік қызметкерді тұрғын үймен қамту мақсатында 133 млн теңге бөлу қарастырылып отыр.
— Қажеттілікті растайтын құжаттарды ұсына отырып, жалдау ақысын өтеуге өтініш білдірген мемлекеттік қызметкердің әрбір отбасы мүшесіне 18 шаршы метрден, әр шаршы метріне 2188 теңгеден жеке шотына аударылатын болады,- деп атап өтті Нәзигүл Искакова.
Қазіргі таңда жалға берілетін пәтер құны шарықтап тұрғанын, жаңа облыстың аяқтан тік тұрып кетуі үшін білікті кадрларға жағдай жасау маңызды екенін айтқан депуттаттар бұл ұсынысты бір ауыздан қолдады.
Сондай-ақ Абай облысы бойынша меншікке немесе пайдалануға берілетін жерлерді пайдаланудың жергілікті жағдайлары мен ерекшеліктеріне қарай, ауыл шаруашылығы мақсатындағы жер учаскелерінің ең аз мөлшерін белгілеу, Абай облысының азаматтарына жеке меншікке тегін ұсынылуы мүмкін жер учаскелерінің шекті мөлшерін белгілеу туралы облыстық ауыл шаруашылығы және жер қатынастары басқармасының басшысы Анзор Абаев хабарлады. Ауылдық аймақта шекті мөлшер қосалқы шаруашылық және жайылым үшін 25 сотық, суармалы жерлер 15 сотық, құрылыс үшін 10 сотық, саяжайларда бау-бақша өсіруге 12 сотық деп белгіленді. Облыстың аудандары мен қалалары төңірегінде азаматтар мен заңды тұлғаларға меншiкке немесе пайдалануға берiлетiн ауыл шаруашылығы мақсатындағы жер учаскелерінің ең төмен (минималды) мөлшерлерi 1,5 гектар және 8,8 гектар аралығында бекітілді. Ал осы мақсаттарға берілетін жерлердің ең жоғары (максималды) мөлшерлері ҚР Үкіметінің 2023 жылғы 25 қаңтардағы № 42 қаулысымен, яғни 227,7 гектар мен 49500,0 гектар аралығында бекітілген.
Ауыл шаруашылығы және жер қатынастары басқармасының басшысына депутаттық сауал жолдаған Қаленбек Қарашев Үржар ауданының шаруалары дизель отынының тапшылығына байланысты жанармай құю бекеттерін күзетуге мәжбүр екенін айтты.
— Облыста көктемгі дала жұмыстарын жүргізуге 19 мың тонна жеңілдікпен берілетін жанар-жағармай бөлінген. Сәуір айында шаруаларға 7 мың тонна жанар-жағармай жеткізілді. Келісімшартқа сәйкес жеткізіліп отыр, кешіктіру болған жоқ,- деп жауап берді бұл сауалға Анзор Абаев.
Депутат тарапынан жанармай жеткізу кестесін құрғанда облыстың оңтүстік бөлігінде орналасқан Үржар ауданының географиялық орнының ерекшелігі ескерілсе деген ұсыныс айтылды.
Сессияда ауыл шаруашылығын субсидиялауға арналған бағдарламадағы өзгерістер жайлы да сөз болды.
Семей қаласында фотобейнетіркеу және бейнеталдау жүйесін құру және пайдалану мемлекеттік-жекешелік әріптестік жобасы бойынша мемлекеттік міндеттемелерді қабылдау туралы жолаушылар көлігі және автомобиль жолдары басқармасының басшысы Асылбек Нұғманов баяндады. Баяндамадан белгілі болғандай, қалада 1511 бейнебақылау камерасы бар. Оның 683-і қоғамдық орындарда, 47-сі көше қиылыстарында және қалғаны көше бойларында орнатылған. Асылбек Нұғымановтың айтуынша, «Сергек» бейнебақылау камерасы іске қосылған сәттен 31 наурызға дейінгі аралықта жылдамдықты шамадан тыс асырған жүргізушілерге салынған айыппұл есебінен 400 млн теңге түсім түсіпті.
Сессияда сонымен қатар күн тәртібінде болған жер үсті және жер асты су объектілерінен су алу ережесін бекіту, Абай облысы мәслихатының аппараты құрылымы жайлы мәселелер ортаға салынды.
