Cемейде көп балалы 32 ана алтын және күміс алқалы болды. Аналарды Семей қаласы әкімінің орынбасары Руслан Базарбаев құттықтап, «Алтын алқа» және «Күміс алқа» төсбелгілерін салтанатты түрде табыстады.
Мұхтар СОВЕТЖАН,
«Семей таңы»
Анаға құрмет көрсету, ізеттілік таныту — қазақ халқының қанына сіңген қасиет. Мемлекет тарапынан көп балалы аналарға үздіксіз қолдау көрсетіліп келеді. Бүгінгі таңда Абай облысы орталығында 4 884 көп балалы отбасы тұрып жатыр. Олар мемлекет тарапынан арнайы жәрдемақы алып отыр.
— Біздің халық әрқашан отбасы құндылығын жоғары қойған. Әке мен ананың мәртебесін биік ұстап, баланың мерейін үстем еткен. Әсіресе баласы үшін жүрегі ауырып, жаны қиналатын, түн ұйқысын төрт бөлетін ананы қадірлеген. Құрметті аналар, отбасының алтын діңгегі болып, тағылымды тәрбие, ізгі дәстүрлер сабақтастығын жалғап жүре беріңіздер,- деп ізгі тілегін арнады қала әкімінің орынбасары Руслан Базарбаев.
Салтанатты жиынға қатысқан 32 ананың 8-і алтын, 24-і күміс алқа тақты.
— Жеті бала тәрбиелеп өсіріп отырмыз. Үлкенім 20-ға толады. Мемлекет тарапынан баланың 18 жасына дейінгі және «Күміс алқаға» берілетін арнайы жәрдемақы аламын. Одан бөлек, мерекелерде сыйлықтар беріледі. Жасым отыз сегізде. Әлі жаспын. «Көп бала өсіріп жатырмын, мемлекет маған көмек беру керек» деген ойдан аулақпын. Жұмыс істеп, өз балаларымды өзім өсіруіме шамам жетеді. Аналарымыз халқымыздың санын саналы ұрпақпен көбейтсін деп тілеймін,- дейді «Алтын алқа» иегері, көп балалы ана Индира Мұратжанқызы.
Айта кетсек, өткен жылы Семей қаласында «Батыр ана» атағымен 2 202 ана марапатталды. Жалпы, 2000-жылдардың басымен салыстырғанда елімізде бала туу көрсеткіші артып келеді.
