Биылғы жылдың қаңтар айынан бері Семей қаласында тіркеуде тұрған 18 жастан бастап 35 жасқа дейінгі жастар үшін «Абай жастары» тұрғын үй бағдарламасы іске қосылған болатын.
Жадыра ТӨЛЕГЕНҚЫЗЫ,
«Semeı tańy»
Бағдарлама аясында әкімшілік тарапынан қатысушыларға 15 млн теңгеге дейін 5 пайыздық мөлшерлемемен 19 жылға ипотекалық несие қарастырылған. Тұрғын үй бағасы 15 млн теңгеден артық болған жағдайда, қалған сомасын үміткер өзі өтеуі қажет.
Семей қаласының тұрғын үй инспекциясы бөлімінің басшысы Диана Шаяхметованың бізге берген мәліметтеріне сүйенсек, «Абай жастары» бағдарламасы бойынша барлығы 514 адам өтінім берсе, оның ішінен 41 үміткер «Отбасы банк» АҚ-ға төлем қабілеттілігінен өтуге жолданыпты. Бүгінгі күні 22 қатысушы баспаналы болды және 2 үміткер үй іздеу үстінде.
Бағдарламада үміткерлердің жұмыс тәжірбиесі, отбасылық жағдайы және бала саны ескерілген. Осы талаптар бойынша ең көп ұпай жинағандар байқаудан өткен. Солардың бірі – отыз бес жастағы үш баланың анасы Ләззат Нығметова. Мамандығы мұғалім Ләззат Теңелқызы бюджеттік қызметкер ретінде жергілікті атқарушы органдарда үш жылдан бері тұрғын үй кезегінде тұрыпты. Бұл орайда жастар санатының ұлғаюы көптеген қазақстандықтар үшін жаңа мүмкіндіктер алып келгені сөзсіз.
— Конкурс қорытындысы бойынша қырықтан жоғары ұпай жинап, алтыншы болып тізімге ендім. Отбасы банк өтінішімізді мақұлдап, он пайыздық бастапқы жарнамен он үш жыл мерзімге бес пайыздық жылдық мөлшерлемемен Цементшілер кентінен екі бөлмелі пәтерге ие болдық. Пәтер құны 15 млн теңгеден асып кеткендіктен, айырмасын өзіміз төледік. «Абай жастары» бағдарламасы біз секілді жанұялар үшін өте тиімді деп айтар едім. Үш баламыз ғана болғандықтан, бұған дейін көп балалы немесе әлеуметтік жағынан аз қамтылған отбасыларға арналған «Бақытты отбасы» секілді бағдарламаларға де іліне алмай жүрдік. Бұл жолы некедегі он екі жылымыз, он үш жылдық жұмыс өтілім, бала саны – барлығы есептеліп, жоғары ұпайға ие болдым. Жалпы, бұл бағдарлама еліміздегі ажырасу санының азаюына, жастардың шаңырақтарын сақтап қалуына оң әсер етеді деп ойлаймын. Сондықтан әрі қарай да жалғаса берсе екен деген тілегім бар,- дейді Ләззат Теңелқызы.
Еске сала кетейік, бағдарламаға 18 жастан 35 жасқа дейінгі мемлекеттік тұрғын үй қорынан тұрғын үй алуға кезекте тұрған жастар, журналистер, мемлекеттік және бюджеттік мекемелерде жұмыс істейтін мәдениет және спорт қызметкерлері, денсаулық сақтау қызметкерлері қатыса алады. Тағы бір айта кетерлігі, бағдарламаға қатысушының немесе онымен бірге тұратын отбасы мүшелерінің атында сатып алу құқығымен және сатып алу құқығынсыз соңғы 5 жыл ішінде жеке немесе жалға алынған тұрғын үй болмауы қажет. Мәдениет, спорт, денсаулық сақтау, БАҚ саласында қызмет ететін үміткерлердің кемінде 1 жыл ресми жұмыс өтілі болуы тиіс. Тұрғын үйге мұқтаж санатқа жататын тиісті жастағы азаматтар, атап айтқанда ата-анасының қамқорлығынсыз қалған балалар, жетімдер, кәсіби қызмет түріне қарамастан, бағдарламаға қатысуға құқылы. Бағдарламаға қатысушы ерлі-зайыптылардың біреуі ғана өтініш бере алады.
Бағдарламаның екінші кезеңі алдағы қазан айында басталады деп жоспарлануда.
