Абай облысы кәсіпкерлерінің қатары толығуда. «Табысты отбасы» жобасының тағы бір түлегі Римма Көпесова Семей қаласында өзінің шағын кондитерлік цехын ашты.
Жадыра ТӨЛЕГЕНҚЫЗЫ,
«Semeı tańy»
Римма Көпесова жалғыз өзі екі бала тәрбиелеп отыр. Жобаға дейін де кондитерлік салаға қызыққан ол өз ісін бастағысы келгенімен, шешім қабылдауға батылы жетпепті. «Табысты отбасы» жобасы аясында біліктілігін арттырған соң бойындағы қорқынышын жеңіп, шағын кәсібін ашып, бүгінде табыс тауып отыр. Қазіргі күні Римма Көпесованың айлық табысы шамамен 400 мың теңгені құрайды. Кәсіпкер тапсырыс қабылдайды және өнімдерін бірнеше дүкенге өткізеді.
«Самұрық-Қазына» АҚ компаниялар тобының бірыңғай қайырымдылық операторы «Samruk-Kazyna Trust» әлеуметтік жобаларды дамыту қорының «Табысты отбасы» жобасының әрбір түлегіне 150 АЕК мөлшеріндегі жабдық түріндегі гранты өз ісін жаңадан бастаған кондитерге жақсы қолдау болды.
— Бүгін мен үшін өте қуанышты күн. Көптен ойымда жүрген кәсібімді бастадым, міне шағын цехымның ашылуы өтіп жатыр. Қазірдің өзінде тапсырыстар алып, табыс тауып жүрмін. «Табысты отбасы» жобасының ұйымдастырушыларына, «Samruk-Kazyna Trust» әлеуметтік жобаларды дамыту қорына айтар алғысымыз шексіз. Жобаның бірнеше қатысушысы аз уақыт ішінде шағын кәсібін ашып үлгерді,- дейді Римма Көпесова.
Кондитерлік цехтың ашылу салтанатына қалалық мәслихат депутаты Шолпан Молдағалиева, «Табысты отбасы» қоры Қамқоршылық кеңесінің мүшесі Бауыржан Оразғалиев, сондай-ақ «Атамекен» кәсіпкерлер палатасының басқарушы директорының салалық даму жөніндегі орынбасары Ерғазы Айтқазин, жоба тәлімгері Лаура Байділданова және жоба түлектері қатысты.
