Абай өңірлік гарнизоны әскери полиция басқармасының жедел ден қою бөлімі «Шығыс» түраралық полигонындағы далалық оқу-жаттығуды аяқтады.
— Абай өңірлік гарнизоны әскери полиция басқармасы жедел ден қою бөлімінің жеке құрамы жоспарға сәйкес өткізілген далалық оқу-жаттығуға белсенді қатысты. Себебі бұл — жаңадан құрылған жедел ден қою бөлімшесінің алғашқы далалық оқу-жаттығуы. Аталмыш бөлімше таяуда құрылғанына қарамастан «Шығыс» полигонында күндізгі және түнгі уақытта жеке құраммен тәжірибелік сабақтарды жедел әрі тиянақты жүргізді.
Далалық жаттығулардың шарықтау шегі шартты жауға қарсы шабуыл болды. Шара барысында жауынгерлер ғимаратты басып алған содырлардың көзін жойып, тұтқынға түскендерді босатты. Мұндай оқу-жаттығулар жауынгерлердің рухын арттырып, тәжірибелік біліктіліктерін шыңдайды, — дейді Абай өңірлік гарнизоны әскери полиция басқармасының жедел ден қою бөлімі ұтқырлар бөлімшесінің бастығы капитан Нұрболат Тайлақбаев.
Оқу-жаттығу барысында жеке құрам қауіпсіздік шараларын қатаң сақтай отырып, жүктелген тапсырмаларды жоғары деңгейде жүзеге асырды.
Еске сала кетсек, 2022 жылдың аяғында құрылған жедел ден қою бөлімі Қарулы Күштер қатарындағы әскери полицияның құқықтық тәртіпті қамтамасыз етуге қатысты тапсырмаларын орындайды.
Абай өңірлік гарнизонының баспасөз қызметі
