Семейде ми ісігі диагнозы қойылған қырық бес жастағы азаматқа медициналық сақтандыру жүйесінің қаражаты есебінен күрделі ота жасалды.
Науқас денсаулығына шағымданып дәрігерлерге жүгінген соң, егжей-тегжейлі зерттеуге жіберіліп, жолдама бойынша мидың компьютерлік томографиясынан (КТ) және магниттік-резонанстық томографиядан (МРТ) өтті.
— Пациент Семей қаласының СМКА нейрохирургия бөлімшесіне емдеуге жатқызылды. КТ және МРТ нәтижелерін алғаннан кейін сол жақ алдыңғы маңдайдың ісігі анықталды. Әрі қарай біз отаға дайындық жүргіздік және BrainLab нейронавигациялық жүйесімен бас сүйегіне сүйек-пластикалық трепанация жасап, ісікті алып тастадық. Операция сәтті өтті, пациент өзін жақсы сезінеді, жағдайы тұрақты,— дейді нейрохирург дәрігер Төлеуғали Қойшыбаев.
Естеріңізге сала кетейік, МӘМС енгізумен КТ және МРТ қазақстандықтар үшін бұрынғыдан да қолжетімді болды. Пациенттерге учаскелік дәрігерден зерттеп-қарауға жолдама алса жеткілікті.
Бүгінгі таңда МӘМС-тегі кез келген сақтандырылған адам қымбат КТ және МРТ зерттеулерінен тегін өте алады. Мәселен, егер 2019 жылы сақтандыру медицинасы енгізілгенге дейін емханалар арқылы 200 мыңға жуық КТ және МРТ қызметтері көрсетілсе, өткен жылы 1 млн 400 мыңға жеткен, яғни 7 есе көп.
Сондай-ақ сақтандыру қаражаты есебінен осы пациентке көрсетілген қызметтер қолжетімді — жоғары технологиялық, қымбат зерттеп-қараулар мен оталар жүргізуге болады.
«СТ» — ақпарат
