Абай облысымен бірге жанданып, 17 жылдан кейін қайта құрылған, кезінде Қазақстанның үш дүркін чемпионы атанған «Елім-ай» футбол клубы 19 ұпаймен Бірінші лигада топ басында келеді.
А.ӘБІЛ,
«Semeı tańy»
Семейлік аяқдоп шеберлері 14 мамырда 7-ші тур аясында Ақтөбе облысына барып, жергілікті «Ақтөбе М» командасын 5:0 есебімен ойсырата жеңді. Ойында Нұрсұлтан Советқазы, Арман Нүсіп, Магомед-Эмин Рабаданов бір голдан салса, Бека Кавтарадзе дубль авторы атанды. Бұған дейін 5-ші тур шеңберінде Шымкентте «Тұран» клубымен кездесіп, 2:1 есебімен жеңіске жеткен болатын. Енді “елім-айлықтар” 31 мамыр күні Алматының орталық стадионында «Хан Тәңірі» футбол клубымен шеберлік байқасады. Клубтың баспасөз қызметінің хабарлауынша, ойынды тамашалағысы келетін жанкүйерлерге пойыздан арнайы вагон да әзірленген.
Семей қаласынан жол жүру 30 мамырға жоспарланған. «31 мамыр күні «Елім-ай» футбол клубы жанкүйерлер үшін арнайы автобус жалдайды. Автобус жанкүйерлерді вокзалдан стадионға тегін апаратын болады»,- делінген клубтың телеграмдағы парақшасында.
Тағы бір айта кетер дүние, ойындарды семейліктер онлайн режимде де тамашалай алады.
Ойынның тікелей көрсетілімі қалалық Арбатта өтеді. Онда Абай облысының қоғамдық даму басқармасына қарасты «Абай Жастары» Жастар ресурстық орталығының ұйымдастыруымен LED-экран орнатылады.
