Жыл сайын сан мыңдаған турист Алакөл көліне келіп демалып, шипалы суға шомылады. Демалушыларға жоғары деңгейде жағдай жасауды облыс басшылығы назарында ұстап отыр.
«Қара жолдың қадірін жүрген біледі» демекші, туристер үшін ең басты мәселе – демалыс аумағына жету. Бұл ретте жазда Алакөл көліне туристер тасымалы әуе, темір жол, автомобиль арқылы ұйымдастырылады.
Әйгерім СӘРСЕНҚАЛИ,
«Semeı tańy»
Облыс орталығы Семей қаласынан Алакөлге дейінгі аралық 680 шақырым болса, соңғы жылдары Семей -Таскескен аралығындағы 383 шақырым жолға көп көңіл бөлінуде. Абай облысы кәсіпкерлік және индустриялық-инновациялық даму басқармасының жеке кәсіпкерлікті қолдау және дамыту бөлімінің басшысы Мұрат Мәлікаджардың айтуынша, қазіргі уақытта жөнделіп жатқан 43 шақырым жол жыл соңына дейін асфальтталмақ.
Ал темір жол қызметін пайдаланатын көлге келушілер Семей — Жалаңашкөл станциясы алқылы қатынайды. Осыған дейін айтылғандай, шомылу маусымында темір жол бағытында арнайы вагондар саны артады.
Туристерді тасымалдауда әуе көлігінің рөлі зор. Бұған дейін «Оңтүстік Аспан» әуе компаниясы 50 адамға арналған АН-24 ұшағымен Алматы — Үржар, Семей – Үржар — Алматы бағыттары бойынша аптасына екі рет тасымал ұйымдастыратын. Енді маусым, шілде, тамыз айларында рейс жиілігі артып, ұшақ аптасына 3-4 рет қатынайды деп жоспарланып отыр.
Қайта жаңғыртылған Үржар әуежайындағы жағымды жаңалықтың бірі Астанадан алғаш рет Bombardier q400 маркалы ұшағының келіп қонуы болды.
— Ауданымызға Астанадан алғаш рет Bombardier q400 маркалы ұшағы келіп қонды. Бұл туристік әлеуетімізді арттыруға, демалушылардың жаз бойы көлге еркін қатынауына жасалған мүмкіндік,- дейді аудан әкімінің орынбасары Дидар Хамитов.
Астана – Үржар — Астана бағытындағы тасымалды QazaqAir әуе компаниясы ұйымдастырады.
— Біз Үржар ауданына ұшуды орындаймыз. Бұл — біз үшін үлкен мәртебе. QazaqAir әуе компаниясын таңдағандарыңыз үшін алғыс айтамыз. Алғашқы рейсте 69 жолаушы ұшып келді. Ұшу ұзақтығы – 1 сағат 25 минут,- дейді екінші ұшқыш Әсет Ағыбаев.
Айта кетсек, Астана – Үржар — Астана бағытындағы рейс аптасына 3 рет ұйымдастырылады. Билет бағасы – 16 мың теңге.
— Үржар — Астана бағытындағы әуе рейсінің іске қосылуы біз үшін өте қуанышты жаңалық болды. Алғашқы жолаушылар қатарында бүгін Астана қаласына ұшқалы тұрмыз. Автокөлікпен екі облысты басып өтіп келетін біздер үшін туған жеріміз жақындай түскендей әсердемін. Билет бағасы да қалта көтерерліктей, қуанышымыз ұзағынан сүйіндірсін,- дейді алғашқы жолаушылардың бірі Тоғжан Төлеуқызы.
