Биыл отандық метрология саласына 100 жыл толып отыр. Қазақстан аумағында алғашқы метрологиялық мекеме 1923 жылы Семей қаласында ұйымдастырылды. 19 мамыр күні, ғасырлық мерейтойға орай, Қазақстан метрологиясының отаны — Семей шаһарында ауқымды іс-шара өтті. Мерекелік шарада «Қазақстан метрологиясына 100 жыл» монументі салтанатты түрде ашылды. Облыстық тарихи-өлкетану мұражайында тақырыптық экспозиция ұсынылып, «Метрология» оқулығының тұсаукесері өтті. Салтанатты шарада ұзақ жылдар бойы аталған салада еңбек еткен үздік метрологтер мен жас мамандарға құрмет көрсетілді.
Әйгерім СӘРСЕНҚАЛИ,
«Semeı tańy»
Ертіс өзенінің оң жағалауында бой көтерген монументтің ашылуына облыс және қала басшылығы, көрнекті ғалымдар, мемлекеттік ұйымдар мен мекемелердің өкілдері және қаламыздағы, сондай-ақ мерейтойға еліміздің әр өңірінен арнайы келген метролог мамандар қатысты.
Ескерткішті ашу құрметі Абай облысы әкімінің орынбасары Айдын Кәрімов пен метрология саласының құрметті ардагері, Семей қаласының тұрғыны Людмила Слесаренкоға берілді.
Абай облысы әкімінің орынбасары Айдын Кәрімов метролог мамандарды, сала ардагерлерін облыс басшылығы атынан мерекелерімен құттықтай келе, метрология саласының маңыздылығына тоқталды.
Келесі ретте сөз алған Қазақстан стандарттау және метрология институтының бас директоры Ғабит Мұхамбетов бүгінгі шара метрология тарихындағы елеулі оқиғалардың бірі екенін баса айтты, ал саналы ғұмырының 26 жылын метрологияға арнаған сала ардагері, Қарағанды облысынан келген Талғат Шинтуринов монуметтің ашылуы метрологтер еңбегіне көрсетілген үлкен құрмет деп бағалады.
— Бүгін Абай бабамыздың туған өлкесінде метрология саласының 100 жылдық мерейтойы өтіп жатыр. Ғасырлық тойға арнайы келдік. Еліміздің түкпір-түкпірінен ардагер метрологтермен бірге бүгінгі күні осы салада еңбек етіп жүрген тәжірибелі қызметкерлер мен жас мамандар келіп отыр. Осы салада жұмыс істеп, зейнетке шыққан біздер үшін мұндай мерейтойға қатысу — үлкен құрмет. Монуметтің ашылуы, жалпы ұйымдастырылып отырған ауқымды шара метрологтер еңбегіне көрсетілген құрмет, жастарға өнеге деп білемін. Ұйымдастырушыларға алғысым шексіз.
Метрология – адамзат өмірінде әр салада күнделікті қолданылатын өлшем бірліктері саласы. Сала өркендей берсін!- деді Талғат Асқарұлы.
Біздің өміріміздің әр түрлі салаларындағы өлшемдердің дәлдігі мен біркелкілігін бейнелеуге арналған монументті орнату бастамасын Қазақстан стандарттау және метрология институты ұсынды, бұл идеяны Қазақстан Суретшілер одағының мүшесі, Қазақстан өнерінің қайраткері және әлемнің 12 елінің Құрметті суретшісі Болат Мұхамедиев іске асырды.
Монументте массаны өлшеу символы – гір тастары, уақыт пен кеңістіктің символы – шар және оны айналдыра ұзындық өлшемін білдіретін лента бейнеленген.
Монумент үш өлшемді модельдеу, көлемді пішін мен құрылымды цифрлық есептеу, құрылымдық элементтер мен бөлшектерді лазерлік өңдеу сынды заманауи технологиямен әзірленген.
Мерейтой аясында Семей қаласының облыстық тарихи-өлкетану мұражайында Қазақстан стандарттау және метрология институты метрологияға арналған жаңа экспозициясын ашты. Экспозицияда бірегей артефактілер, соның ішінде тарихи өлшеу аспаптары, сирек кездесетін үлгілер, сондай-ақ метрология саласындағы заманауи технологиялар мен инновациялық әзірлемелер ұсынылған. Музей қонақтары елімізде пайдаланылған алғашқы өлшеу аспаптарын тамашалап, оларды қазіргі заманғы дәлдігі жоғары өлшем құралдарымен салыстыра алады.
«Метрология» оқулығының тұсаукесерінде сөйлеген сөзінде Қазақстан стандарттау және метрология институтының бас директоры Ғабит Мұхамбетов:
— Бұл дәлдік пен өлшемдер негіздерін меңгергісі келетін студенттер, оқытушылар мен мамандар үшін маңызды оқу құралы болмақ,- деп атап өтті.
