Кеше, 22 мамыр күні Абай облысы әкімдігінде ҚР Оқу-ағарту министрі Ғани Бейсембаев және облыс әкімі Нұрлан Ұранхаев Абай облысының білім беру жүйесін дамыту бойынша 2023-2029 жылдарға арналған жол картасына қол қойды.
Маңызды құжатқа қол қою рәсіміне ҚР Оқу-ағарту министрлігінің өкілдері, облыс басшылығы, қала және аудан әкімдері, білім басқармасы мен білім бөлімдерінің басшылары қатысты.
Айкөркем МАҚЫШ,
«Semeı tańy»
— Мемлекет басшысы Қасым-Жомарт Тоқаевтың білім саласын дамытуға ерекше назар аударуының арқасында саладағы шешім таппай жүрген мәселелердің түйіні тарқатыла бастады. Абай облысының әлеуметтік-экономикалық дамуының 2023-2027 жылдарға арналған кешенді жоспары аясында білім беру жүйесін серпінді дамытуға арналған бірқатар маңызды шаралар белгіленген. Бүгінгі күні облыс мектептеріндегі орын тапшылығы 8700 орынды құрайды. Жоспар бойынша, 2027 жылға дейін 9500 орындық 18 мектеп салу арқылы бұл мәселе шешім табады деп жоспарланып отыр, оның ішінде 5 мектептің құрылысы биыл басталады,- деген облыс әкімі қабылданғалы отырған Абай облысының білім беру жүйесін дамыту жөніндегі аймақтық жол картасының маңыздылығына тоқталып, оны жүзеге асыруды қала және аудан әкімдеріне, құрылымдық басқарма басшыларына тапсыратынын айтты.
Оқу-ағарту министрі Ғани Бейсембаев 2023-2025 жылға дейін бөлінген қаржы өткен жылдармен салыстырғанда 3 есеге жуық өскенін айта келе, саладағы бірқатар маңызды жаңалықтармен таныстырды.
— 1 қыркүйектен бастап мектепке дейінгі білім беру саласында тәрбиешілердің жалақысы 30 пайызға өседі. Балабақшаларда 100 мыңға жуық бала тегін тамақтанады. Сонымен бірге жаңа оқу жылында 1-4 сынып оқушылары тегін тамақпен қамтылады,- деген министр 72 мектепті қаржыландыруға 100 млрд-тан астам қаржы бөлінгенін айтты.
Ғани Бейсембаевтың айтуынша, саладағы басты міндеттердің бірі – ауыл мектептерінің материалдық-техникалық базасын нығайтып, ұстаздардың біліктілігін арттыру арқылы білім сапасын әлемдік деңгейге көтеру.
— Биыл алғаш рет ауыл мектептерінің мүмкіндігін арттыру мақсатында ауыл мектептері арасында республикалық пән олимпиадасын өткізу туралы шешім қабылданып отыр. Мектептердің барлығын инновациялауды қолға алу жоспарлануда. Іссапарымның аясында облыс аудандарындағы мектептерді аралап, жай-күйімен таныстық. Ауыл мектептерінің әлеуетін арттыру бағытында бірқатар жұмыстар жүргізілетін болады. Ауыл мұғалімдері «Болашақ» бағдарламасы бойынша 3 айлық және 6 айлық тағылымдамадан өтеді. Бұл ауыл мектептеріндегі білім сапасын әлемдік деңгейге көтеруге жол ашпақ,- деді министр.
Ғани Бейсембаев айтқандай, мектеп пен балабақшадан бөлек, колледждер мәселесі де назардан тыс қалмайды. Колледж студенттерінің шәкіртақысы 1 қыркүйектен бастап 50 пайызға артады, жатақханамен қамту жұмыстары жалғасын табады. Колледж оқытушылары мен мектеп басшыларының жалақысын 50 пайызға өсіру мәселесі қарастырылуда.
Осындай жағымды жаңалықтарды бөліскен Оқу-ағарту министрі еліміздің рухани астанасы саналатын киелі өңіріміз өзге облыстарға үлгі болатынына сенімін білдірді.
— Абай елі мектептері, балабақшалары, жалпы білім беру жүйесі өзге өңірлерге үлгі болады деген сенімдемін,- деп сөзін қорытындылады министр.
Оқу-ағарту министрі Ғ.Бейсембаев және облыс әкімі Н.Ұранхаев Абай облысының білім беру жүйесін дамытудың 2023-2029 жылдарға арналған жол картасына қол қойды.
