Бүгін Шәкәрім шығармаларын жарыққа шығарушы, ән қоржынында 300-ге тарта әні бар Көлденбай Өлмесековтың жетпіс жылдығына орай өзі тұрған үйде әншінің құрметіне арналған мемориалды тақтаның ашылу рәсімі өтті. Ескерткіш тақтаның ашылу рәсіміне қала әкімі Нұрбол Нұрсағатов, Абай облысы мәдениет басқармасының басшысы Айдар Ибраев және әншінің көзін көрген жерлестері қатысты.
«Келденбай Раузаұлы еңсерген биіктер, бағындырған белестер, қол жеткізген жетістіктер кез келген жан қызығардай тағылымды. Абайша айтсақ, «өлмейтұғын артына сөз қалдырған» Келденбай Өлмесековтің Шәкәрім мұрасының іздеушісі ретінде тарих бетінде қалары анық. Бүгін ашылғалы жатқан ескерткіш тақта қаламыздағы жас өнерпаздарға темірқазықтай жол көрсетер жарық сәуле болсын»,- деп атап өтті Нұрбол Нұрсағатов.
Жиын барысында әншінің ән қоржынынан әндер шырқалып, естелік ғұмырнамалар айтылды.
