Қала әкімі Айбек Кәрімов оң жағалау тұрғындарымен кездесті. Жиын барысында шаһарымыздың әлеуметтік-экономикалық тұрғыда дамуы және инфрақұрылымының жетілдірілуі жөнінде сөз болды. Кездесу кезінде тұрғындар қала басшысына өздерін толғандырған сұрақтарын қоюға мүмкіндік алды.
Кездесуден бұрын қала басшысы Затон ауданында орналасқан РК-3 жылу қазандығында болып, оның жұмысымен және жылу маусымына дайындық барысымен танысты. Екінші жылу учаскесінің басшысы Николай Ушаков қала әкіміне қажетті шаруалардың тоқсан пайызға жуығы атқарылғанын мәлімдеді. Оның сөзінше, жөндеу жұмыстары аяқталып, тек қана арнайы кабельді ауыстыру қалған көрінеді. Жылу маусымына дайындық деңгейімен танысқаннан кейін, қала әкімі болашақта бұл жерде тиімді жұмыс істейтін замануи шетелдік құрылғыларды орнату қажеттігін тілге тиек етті. Айбек Мүталапханұлы қазандықтың жұмысын жетілдіру өз кезегінде қалада ашылатын кәсіпорындардың да жұмысына пайдасы тиетініне тоқталды.
— Болашақта бұл ауданда жүн өңдеу фабрикасы орналастырылады. Аталмыш кәсіпорын өзіне қажетті ыстық суды басқа емес дәл осы қазандықтан алатын болады. Сол себепті қазандықтың инфрақұрылымын ары қарай дамыту қажет, — деді қала әкімі.
Затон ауданы тұрғындарымен болған кездесуде Айбек Мүталапханұлы тұрғындарға қаланың дамуы жайлы ақпарат берді. Оның ішінде, әлеуметтік-экономикалық тұрғыда даму мен инфрақұрылымды жетілдіруге кеңінен тоқталды. Қала басшысының мәліметіне қанық болған жұртшылық өз кезегінде көкейлерінде жүрген сауалдарын қойды. Солардың арасында көшелердің тазалығы мен жолдарды жөндеу жұмыстарының сапасы туралы сұрақтар болды. Бұл орайда қала басшысы былайша жауап берді:
{jcomments on}- Жалпы, бізде қазір сапалы жол төсемін жасайтын барлық жағдай бар. Қажетті шикізат та өзімізден табылады. Тек оны жасаудың технологиясын меңгеруіміз керек. Сонда ғана біз ұзақ уақыт пайдалануға жарарлық жол төсемін жасайтын боламыз. Осыған байланысты, біз біраз уақыттан бері бұл салада мол тәжірибесі бар мәскеулік маманмен бірлесіп жұмыс істеудеміз. Осы жұмыстың нәтижесі белгілі болғаннан кейін нақты шаруаларды жүзеге асырамыз.
Сондай-ақ жиында жаңадан салынған жедел медициналық жәрдем ауруханасын жылумен қамтамасыз етілуі жайлы сауал қойылды. Қазіргі таңда денсаулық мекемесі электр құрылғыларымен жылытылып отыр-ған көрінеді. Айбек Мүталапханұлы бұл мәселенің шешілуін назарда ұстап отырғанын тілге тиек етті.
— Жаңа жедел медициналық жәрдем ауруханасын жылумен қамтамасыз ету мәселесін шешудің оңтайлы жолы бар. Таяу арада сол маңайдағы №18 мектептің жылу қазандығынан медициналық мекемеге дейін арнайы құбыр тартылады. Мектеп қазандығы қажетті жылуды артығымен өндіруге қуаты жетеді. Сондай-ақ болашақта аурухана жанынан медициналық қызметкерлерге арнап қалашық салу жоспарда бар. Себебі, ауруханада жұмыс істейтін медбикелермен дәрігерлердің жұмысына жағдай жасау қажет деп есептеймін. Олар тұратын қалашықтағы үйлерге берілетін жылу мәселесін де жоғарыда айтылған жолмен шешуге әбден болады, — деді қала басшысы. Сонымен қатар, Айбек Кәрімов қалада жауын-шашын суын ағызатын арнайы құбыр жүйесінің жоқтығын да сөз етті. Яғни қатты нөсер жауған кездерде көшелерде судың жиналып қалуы соның салдарынан орын алатын көрінеді. Қала басшысы бұл да тұрғындарды мазалайтын, тез арада шешімін табуға тиіс мәселе екенін және оны шешудің жолдары қарастырылып жатқанынан мағлұмат берді.
Жиын соңында тұрғындар қаламыздың дамуы жайлы, жергілікті билік тарапынан өзекті мәселелерді шешу жолында атқарып жатқан шаруалары туралы жан-жақты ақпаратқа қанығып, өздерін мазалаған сұрақтарға толыққанды жауап бергені үшін қала басшысына ризашылықтарын білдіріп, алдағы уақытта жоспарланған жұмыстарының жемісті болуына тілектес екендіктерін жеткізіп тарқасты.
Мирас ҚҰСАЙЫН,
«Семей таңы»
