30 мамырда Бас Прокурор Берік Асыловтың төрағалық етуімен құқық бұзушылықтың алдын алу және жасалған қылмыстардың нәтижесінде келтірілген залалды өтеу жөніндегі шаралардың тиімділігі бойынша Қазақстан Республикасының Заңдылықты, құқықтық тәртіпті және қылмысқа қарсы күресті қамтамасыз ету жөніндегі үйлестіру кеңесінің отырысы өтті.
Үйлестіру кеңесінің жұмысына Президент Әкімшілігінің өкілдері, сондай-ақ құқық қорғау және арнаулы мемлекеттік органдардың, бейінді министрліктердің басшылары және басқа да мүдделі тұлғалар қатысты.
Бірінші мәселені талқылау барысында соңғы үш жылда қылмыстардың жалпы саны азайып келе жатқаны атап өтілді.
Ағымдағы жылы ауыр қылмыстар 23,5%-ға және аса ауыр қылмыстар 29%-ға аз тіркелген. Адам өлтіру, тонау, қарақшылық, бұзақылық саны азайған.
Сонымен бірге қылмыстық іс-әрекеттердің жекелеген түрлерінің деңгейі алаңдаушылық туғызады.
«Біз азаматтардың қауіпсіздігіне анағұрлым теріс әсер ететін қылмыстардың алдын алуды күшейтуіміз керек. Бұл міндетті Мемлекет басшысы қойып отыр», — деп атап өтті Бас Прокурор Б.Асылов.
Есірткінің заңсыз айналымына қарсы күрес мәселелеріне ерекше назар аударылды.
Бүгінгі таңда елдегі есірткі жағдайы «дәстүрлі» есірткіні синтетикалық аналогтармен белсенді түрде алмастырумен сипатталады.
Соңғы деректер бойынша алып қойылған «синтетика» көлемі 3 есеге артқан.
«Мефедронның», «Тұздың» және басқа препараттардың Интернет пен салымшылар арқылы кеңінен қол жетімділігі өзекті мәселе болып отыр.
Қабылданған шаралардың нәтижесінде 3 жылда 122 есірткі зертханасы жойылды, есірткі таратумен айналысатын 17 ұйымдасқан қылмыстық топ қызметінің жолы кесілді, заңсыз айналымнан 37,5 тонна наркотикалық құралдар алып қойылды.
Сондай-ақ кеңесте балалар қылмысының, кәмелетке толмағандардың жыныстық тиіспеушілігіне қарсы қол сұғушылықтардың, отбасылық-тұрмыстық зорлық-зомбылықтың, алаяқтықтың және басқа да құқыққа қайшы әрекеттердің алдын алу мәселелері қаралды.
Талқылау қорытындысы бойынша уәкілетті органдар үшін бірқатар ұсынымдар әзірленді.
Алдын алу мақсатында Ішкі істер министрлігіне бейнебақылау енгізу бойынша жұмыс шеңберінде жергілікті жерлерде «соқыр» аймақтарды анықтау және адамдар топталып жиналған жерлерде, көңіл көтеру орындары мен алкогольді өткізетін түнгі нүктелердің жанында камералар орнату ұсынылды.
Бұған қоса, тәуекел отбасылар мен жанжалқорларды есепке алуды қамтамасыз ету, олармен алдын алу жұмысын үнемі жүргізу ұсынылды.
Ағарту, ғылым және жоғары білім министрліктеріне оқу орындарында қауіпсіз ортаны құру бойынша тәсілдерді қайта қарауды ұсынды.
Бұл ретте, тәуекел топтарын ерте анықтауға және психологиялық жұмысқа, әсіресе есірткіге бейім адамдармен жұмыс істеуге назар аудару керек.
Денсаулық сақтау министрлігіне есірткіге тәуелді балаларға арналған оңалту орталықтарын құру бойынша жұмыс істеу ұсынылды.
Жалпы, кеңеске қатысушылар қылмысқа қарсы күресте ведомствоаралық өзара іс-қимылды күшейту және қазіргі заманғы сын-қатерлерді ескере отырып, құқық бұзушылықтардың алдын алу бойынша шаралар кешенін өзектендіру туралы шешім қабылдады.
Құқық бұзушылықтардың алдын алу жөніндегі өңірлік комиссияларға өңірлердің ерекшеліктерін ескере отырып, қылмыс жасаудың себептері мен жағдайларын жою жөнінде белсендірек шаралар қабылдау ұсынылды.
Берік Асылов облыстық прокурорларға үйлестіру кеңестерінде азаматтардың қауіпсіздігіне әсер ететін қылмыстардың алдын алу жөніндегі шаралардың тиімділігін қарауды тапсырды.
Екінші мәселе аясында қылмыс нәтижесінде келтірілген залалды өтеудің өзекті проблемалары талқыланып, оларды жою бойынша бірқатар шаралар әзірленді.
Тергеу органдарының алдына азаматтар мен мемлекетке келтірілген залалды өтеу үшін құқықтық құралдарды барынша пайдалану, бұл үшін қылмыскерлердің мүлкіне билік етуін шектеу және оларды қамауға алу жөнінде шұғыл шаралар қабылдау міндеті қойылды.
Отырыс соңында Бас Прокурор криминогендік жағдайды жақсарту жөніндегі міндеттерді шешудің және қылмыстың барынша қауіпті түрлерінің алдын алу бойынша пәрменді шаралар қабылдаудың маңыздылығын атап өтті.
Бас прокуратураның баспасөз қызметі
