1 қазан – қарттар күні. Бұл күн БҰҰ Бас Ассамблеясының шешімімен 1990 жылы белгіленген болатын. Қарттар күнін Семейдегі түрлі мекемелер мен ұйымдар атап өтіп, еңбек демалысындағы бұрынғы қызметкерлерін құттықтады. Айтулы мейрамға орай, сәрсенбі күні қала әкімі Айбек Кәрімов Шығыс Қазақстан аймақтық энергетикалық компаниясында болып, еңбек ардагерлерімен кездесті.
Кездесуге «ШҚ «АЭК» АҚ басқарма төрағасы Асқар Балабатыров, қалалық ардагерлер кеңесінің төрағасы Амантай Доғалақов қатысты. Айтулы шараға энергетика саласында ұзақ жылдар еңбек еткен 80-нен астам адам шақырылған. Кездесу барысында алғашқы болып сөз алған қала басшысы Айбек Кәрімов қариялармен жүздесіп отырғанына өзінің қуанышты екенін жеткізді.
— Біз ежелден үлкендерді сыйлап, қарттарын ардақтаған елміз. Ал энергетика саласында қызмет істеген ардагерлердің елімізге, қаламыздың экономикасына қосқан еңбегі ерекше. Энергетика саласында қызмет еткен барлық аға буын өкілдеріне жергілікті биліктің атынан үлкен рахмет айта отырып, отбасыларыңызға амандық, дендеріңізге саулық, ұрпақтарыңыздың қызығын көріп, ендігі уақытта жастар тәрбиелеудегі жұмыстарыңызға жеміс тілеймін. Мерекелеріңіз құтты болсын! – деді Айбек Мүталапханұлы өз сөзінде.
Сонымен қатар, қала басшысы бүгінде күнделікті өмірді электр қуатынсыз елестету мүмкін емес екенін, бұл орайда «ШҚ «АЭК» АҚ тарапынан электр және жылу қуатын өндіруге қатысты ауқымды жұмыстардың атқарылып жатқанын атап өтті. Сондай-ақ, қазіргі уақытта шаһардың инфрақұрылымын қайта қалпына келтіруге байланысты да көптеген жұмыстардың жүргізіліп жатқанын сөз еткен Айбек Мүталапханұлы бұл бағытта мемлекеттік бағдарламалар қабылданып, инвестициялар салынып, болашақта энергия қуатын өндіруде жаңа технологияларды енгізуге мән берілетінін жеткізді.
{jcomments on}Өз кезегінде сөз алған «ШҚ «АЭК» АҚ басқарма төрағасы Асқар Балабатыров өзінің аталмыш компанияда 3 жылдан бері қызмет атқарып келе жатқанын тілге тиек етіп, энергетика саласы бойынша Семейде еңбек етіп жүрген мамандардың біліктілігінің жоғары екенін атап өтті. Сондай-ақ, Асқар Балабатыров компания тарапынан сала ардагерлеріне ерекше көңіл бөлінетініне тоқталды. Қазыналы қарттарды төл мерекелерімен құттықтады. Қалалық ардагерлер кеңесінің төрағасы Амантай Доғалақов та қарияларды қарттар күні мерекесімен құттықтап, өзінің жылы лебізін білдірді.
Шара барысында Нұрлыбек Әділов, Валерий Черкашев, Галина Осиененко сынды бірқатар энергетика саласының ардагерлері «Еңбегі сіңген энергетик» төс белгілерімен марапатталып, қаржылай сыйлыққа ие болды. Энергетика саласының ардагері, Қазақстанның еңбек сіңірген энергетигі Ғабиден Мұсайынов сөз алды.
— КСРО-ның кезінде энергетика саласын, ондағы техникаларды қазақ ұлты өкілдерінің меңгеретініне сенімсіздік болған еді. Алайда бүгінгі таңда ұлттық кадр жасақталған. Аталмыш салада қазақтың балалары табысты еңбек етуде. Бұл үшін қуаныштымыз. Ардагерлердің ізімен келе жатқан жас толқындардың еңбегіне жеміс тілегім келеді. Қарттар күні мерекесі құтты болсын! – деді Ғ.Мұсайынов.
Нұрдәулет КӘКІШЕВ, «Семей таңы»
