ТМККК және ӘМСҚ бойынша халыққа медициналық көмекті 68 мекеме – 34 жеке және 34 мемлекеттік мекемелердің бөлімшелері көрсетеді. 2023 жылы медициналық көмек көрсетуге қаржыландыру көлемі 20 пайызға өскен.
Жадыра ТӨЛЕГЕНҚЫЗЫ,
«Semeı tańy»
Бұл туралы облыстың ӨКҚ-де өткен баспасөз мәслихатында «ӘМСҚ» КеАҚ өңірлік филиалының директоры Ғалымжан Әбілов мәлімдеді.
— Бүгінгі таңда Қордың көрсетілген медициналық қызметтер үшін төлем жасамайтыны туралы ақпарат таралуда. Бұл мәлімдемелер шындыққа жанаспайды. Қор төлемді жасалған шарттардың сомалары шегінде толық көлемде жүзеге асырады. Медициналық ұйымдар мен олардың бірлесіп орындаушылары шарт талаптарына сәйкес келмейтін төлемді талап етеді, — деді ол.
Ғалымжан Әбілов сонымен қатар салада проблемалардың да жоқ емес екенін атап өтті. Мысалы, кейбір мекемелер жалған есептер жасап, артық диагноздар қояды. Амбулаториялық-емханалық көмек көрсететін мемлекеттік ұйымдарда зертханалық диагностикалық қызметтерді, маманданған дәрігерлердің консультациялық көмектерін көрсетуді дамытуға ұмтылыс жоқ.
— Сондай-ақ денсаулық сақтау министрлігі қаржы компонентін шамадан тыс тұтынуды тежеу үшін биылғы жылдың 1 ақпанынан бастап консультациялық-диагностикалық қызметтерге қаржы ағындарын бақылаудың желілік шкаласын енгізді, бұл бейінді мамандарды тексеруге және консультация беруге жіберу кезіндегі кемшіліктерді анықтайды. Атап айтқанда, емдеудің клиникалық хаттамалары, медициналық қызмет көрсетудің стандарттары мен ережелері сақталмайды. Яғни пациенттің дәрігерге жүгіну себебі дұрыс көрсетілмейді, жолдама кезінде диагноз қойылмайды, бұл медициналық қызметтерді шамадан тыс тұтынуға алып келеді, — деп атап өтті Ғалымжан Әбілов.
2023 жылғы бірінші тоқсанда 3 703 718 598,8 теңге сомасына 1 535 018 қателік, оның ішінде ағымдағы мониторинг кезінде 34 798 509,83 теңге сомасына 16 236 асыра пайдалану жағдайы анықталды.
— Көрсетілген қызметтер тіркелген, бірақ іс жүзінде медициналық қызметтер көрсетілмеген жағдайда, бұл туралы медициналық сақтандыру қорына хабарлауды сұраймыз. Мұны Telegram-да @saqtandyrybot боты арқылы жасауға болады: «өтінішті 1406-ға қалдыру (1414 жылдың 1 шілдесінен бастап)» бөлімін таңдап, ЖСН, өтініш мәтінін енгізіп, хабарлама мәтінін тіркеңіз. Сондай — ақ сіз алған медициналық қызметтердің тарихын EGOV сайтында немесе медициналық ақпараттық жүйелердің (мысалы, Damumed және басқалары) мобильді қосымшалары арқылы тексеруге болады, — деді Ғалымжан Әбілов.
Аудандар мен ауылдық округтерде сақтандырылмаған азаматтардың көп болуы – басты мәселелердің бірі.
— Барлық сақтандырылмаған азаматтарды ӘМСҚ жүйесіне қосылуға шақырамын. Сақтандырылған азаматтар ӘМСҚ пакетінде медициналық қызметтердің кең спектріне қол жеткізе алады және медициналық қызметтердің көлемі мен құны төленетін жарналардың мөлшерімен шектелмейді. ӘМСҚ-ға ең төменгі жарналар мен аударымдарды жылына 42 мың теңге көлемінде төлейтін пациенттер медициналық көмекті тегін алады, бұл ретте олардың жарналарының сомасы маңызды емес,- деп түйіндеді сөзін Ғ.Әбілов.
