Әлихан Бөкейхан университетінде Абай облысы білім басқармасының инновациялық-әдістемелік орталығы мен «Abai IT-Valley» технологиялық кластерінің бірлесе ұйымдастыруымен мектеп оқушылары және «XYz Battle» колледждерінің студенттері арасында 3D модельдеу бойынша өңірлік чемпионат өтті.
Ерзат ЖЕТІБАЕВ,
«Semeı tańy»
Сайыстың мақсаты — IT-технологиялармен айналысатын дарынды оқушылар мен студенттерді анықтау және қолдау көрсету, «3D модельдеу» құзыреттілігі бойынша кәсіптік оқыту негіздерін насихаттау және ілгерілету.
Чемпионатқа Семей, Курчатов қалаларынан, Абай, Бородулиха, Ақсуат, Үржар, Аягөз аудандарынан келген 43 қатысушы екі түрлі жас санаты бойынша, яғни 10 жастан асқан және 14 жастан асқан қатысушылар екі топқа бөлініп сайысқа түсті.
Іс-шара барысында сайыскерлер берілген тапсырмалар бойынша 3D модельдерді әзірлеуден сайысқа түсті.
Жарыс соңында әр түрлі жас санаттары бойынша жеңімпаздар анықталып, оларға «Abai IT-Valley» технологиялық кластерінің оқыту курстарына қатысуға сертификаттар және ақшалай сыйлықтар тапсырылды. Ал І орынды жеңіп алған Семей қаласының экономикалық лицейінің студенті С.Аубакиров Әлихан Бөкейхан университетінің оқу грантына ие болды.
Он жастан асқан балалар арасында І орынды №43 мектептің оқушысы Н.Сидоров, ІІ орынды Абай ауданынан қатысқан мектеп оқушысы Е.Серікболсын, ал ІІІ орынды Семей қаласының № 40 мектебі оқушысы В.Новоселов жеңіп алды.
Ал 14 жастан асқан қатысушылар арасында Семей қаласының экономикалық лицейінің оқушысы І орынға С.Аубакиров, ІІ орынға Семей қаласының қаржы-экономикалық колледжінің студенті Н.Төреханов, ІІІ орынды Абай ауданынан келген мектеп оқушысы А.Дулатұлы иеленді.
