Қала әкімі Айбек Кәрімовтің төрағалық етуімен Семей қаласы әкімдігі жанындағы құқықбұзушылықтың алдын алу жөніндегі ве- домствоаралық комиссияның отырысы болып өтті.
Комиссияның күн тәртібінде «2014 жылдың 28 мамырында өткен құқықбұзушылықтың алдын алу жөніндегі ведомствоаралық комиссия мәжілісі отырысының хаттамалық шешімінің орындалу барысы» және «Қазақстан Республикасында сыбайлас жемқорлыққа қарсы әрекет жөніндегі 2011-2015 жылдарға арналған салалық бағдарламаның Семей қаласында 2011-2015 жылдары орындалу шаралары жоспарының орындалуы» мәселесі қаралды.
Күн тәртібіндегі бірінші мәселе бойынша құқық қорғау органдарымен жұмыс бөлімінің басшысы Зухра Қасымжанова және екінші мәселе бойынша Семей қаласы прокурорының орынбасары Дулат Серікбаев, қалалық ішкі саясат бөлімінің басшысы Айдар Садырбаев баяндама жасады.
Мәжіліс барысында 2014 жылдың 28 мамырында өткен құқықбұзушылықтың алдын алу жөніндегі ведомствоаралық комиссия мәжілісі отырысының хаттамалық шешімінінің орындалу барысы туралы ақпаратпен таныстырған З.Қасымжанова жол қозғалысы барысында орын алатын заң бұзушылықтар туралы ақпаратпен бөлісті. Бөлім басшысы бірінші кезекте жүргізушілердің мәдениетін көтеру мақсатында түсіндіру жұмыстары жүргізілгенін, жол көлік оқиғаларының алдын алу бойынша БАҚ арқылы хабарланғанын атап өтті.
— Әкімшілік полиция қызметінің негізгі жұмыстарының бірі тұрғындар арасында жол көлік оқиғаларының алдын алу туралы түсіндіру жұмыстарын жүргізу болып табылады. Аталған шаралар қоғамдық ұйымдар, кәсіпорындар, әртүрлі ведомстволармен тығыз қарым-қатынаста өткізілді, — деді З.Қасымжанова.
Бүгінгі күні Семейде жүргізушілермен 30 мың жол ережесін бұзу оқиғалары орын алып, құқық бұзғандарға 340 миллион теңгеден астам айыппұл салынған. Осы ретте қала әкімі комиссия отырысына қатысушыларға бір ескі көпірдің өзінде ғана тәртіптің сақталмайтынын, мәселе өткен жиында да айтылғанын атап өтті. Айбек Мүталапханұлының айтуынша, аталмыш көпірде әрдайым апатты жағдай орын алады. Мәселен, жүргізушілердің жылдамдықты шамадан тыс арттыруы, қарсы бағытқа шығуы, көлік қатарының көбеюі сынды әрекеттер апатты жағдайларды көптеп туындататын көрінеді.
{jcomments on}- Ең бастысы, ереже бұзушылық орын алмауы керек. Оған қазіргі күні қандай кедергілер бар? Комиссия отырысында осы мәселелерді талқылауымыз керек, бұл жерде мәселені шешетін бірден-бір жол – бейнебақылау қондырғыларын орнату. Ескі көпірге қосымша екі бейнебақылау қондырғасын орнату қажет,-деді қала басшысы.
Айбек Мүталапханұлы қалалық ішкі істер басқармасының басшысы Жұмабек Исаділовке адамдар көп жиналатын және маңызды көшелерге бейнебақылау қоятын орындарды нақтылы анықтауды тапсырды. Оның айтуынша, мәселені осындай жолмен ғана шешуге болады. Ал оған қаланың техникалық базасы жеткілікті екенін, әсіресе, «Қазақтелеком» АҚ мүмкіндіктерін толық пайдалану қажеттігін айтты қала басшысы.
Келесі кезекте сыбайлас жемқорлықтың алдын алу мен жемқорлықпен күрес мәселелері бойынша баяндама жасаушылар бұл бағытта атқарылып жатқан жұмыстар мен олардың оң нәтижелері туралы мәліметтер келтіріп өтті. Қалалық ішкі саясат бөлімінің басшысы Айдар Садырбаев жыл басынан аталмыш тақырыпта әртүрлі кездесулер ұйымдастырылғанын жеткізді. Оның айтуынша, тоғыз айдың қорытындысы бойынша 16 дөңгелек үстел, 23 кездесу және 20-дан астам дәріс өткізіліп, бұқаралық ақпарат құралдарында 30 ақпарат жарияланған.
Отырыста Айбек Мүталапханұлы осындай сауалнамаларды барынша көбірек жүргізуді, зерттеу жұмыстарының БАҚ-та жариялануын тапсырды. Әкім, сондай-ақ, осы бағытта жүйелі жұмыстар атқарылу қажеттігін және мемлекеттік қызметкерлерге қатысты нақты мәліметтер беру, әр бөлім осы жұмыстарды тиянақты атқару керектігін айтты.
Құқықбұзушылықтың алдын алу жөніндегі комиссия отырысын қала әкімі Айбек Кәрімов қорытындылап, сыбайлас жемқорлықпен күрестің басты бағыты — жемқорлықты болдырлау, оның алдын алу екендігін ескертті. Отырыс қорытындысы бойынша сыбайлас жемқорлық пен құқықбұзушылықтың алдын алу бойынша нақтылы шаралар қолдану туралы шешім қабылдады.
Асан МЫРЗАХАНОВ, «Семей таңы»
