Аягөз ауданы Мамырсу ауылының тумасы — меценат Қанат Оспанов жерлестеріне тамаша тарту жасады. Бозай елді мекеніндегі 43 үйге өз қаражаты есебінен ауыз су тартып берді.
А.ӘБІЛ,
«Semeı tańy»
— Бұл ауылда бар-жоғы 95 түтін. 442 адам адам тұрып жатыр. Осыдан екі жыл бұрын Шығыс Қазақстан облысы Аягөз ауданынан облыстық мәслихатқа депутат болып сайланған Қанат Рысбекұлы Оспанов Бозай елді мекенінің тұрғындарымен кездескенде ауыз су мәселесі көтерілген еді. Сол кезде халық қалаулысы су желілерін тартып, тұрғындарды сапалы ауыз сумен қамтамасыз етуге уәде берген екен. «Уәде серт болар» демекші, атымтай жомарт азамат Бозай жұртшылығына берген уәдесін ұмытпапты. Қанат Рысбекұлы қайта депутат болып додаға түспесе де, «Ер жігіттің екі сөйлегені өлгені» дегендей, айтқан сөзінде тұрды. Халық риза,- дейді Мамырсу ауылдық округінің әкімі Тілеукен Әлжекеев.
Ауыз су бүгінде елімізде өзекті мәселенің біріне айналып отыр. Абай облысы бойынша орталықтандырылған суға қолжетімділік 91,9 пайызды құрайды (қала — 92,8 пайыз, ауыл — 90,5 пайыз). Өңірдегі 327 елді мекеннің 35-і орталықтандырылған ауыз сумен қамтамасыз етілмеген. Ал Аягөз ауданы бойынша 50 елді мекеннің 45-і орталықтандырылған ауыз суға қол жеткізген, бұл 90 пайыз көрсеткіш болып табылады (елді мекендердегі 30 мыңнан астам адам сапалы ауыз сумен қамтамасыз етілген).
2018 жылдан бері құрылысы аяқталмаған Ай, Қопа ауылдарындағы су бөгеті және су құбыры желілерін тартуда біршама қиындықтар туындаған. Жоба бойынша, Ай ауылында 13,9 шақырым су құбыры құрылысы, Қопа ауылында 25,6 шақырым су құбыры құрылысын жүргізу жоспарланған. Қазіргі уақытта жобалық–сметалық құжаттамаларын түзетуден өткізу бойынша жұмыстар атқарылуда. Бұл елді мекендердегі су құбырын аяқтау үшін облыстық бюджеттен 700 миллион теңге бөлінген.
Қазіргі таңда Аягөз қаласының тұрғындарын таза ауыз сумен қамту жобасы жүзеге асырылуда. 19 шақырымға су құбыры төселді, құрылыс ағымдағы жылы аяқталады деп жоспарланған. Аудандағы Қорық ауылындағы су құбыры желілерінің құрылысы жер асты суларының шығуына байланысты уақытша тоқтатылып, жобалық-сметалық құжаттарына түзету енгізіліп жатыр.
