Өткен аптада аудан әкімінің орынбасары Б.Самежанов жұмыс сапарымен Шар қаласында болып, жаңадан бой көтеріп жатқан тұрғын үйлердің құрылысымен танысты.
Бүгінгі таңда мердігер — «Жарма құрылыс газ» жауапкершілігі шектеулі серіктестігі екі пәтерлі бес тұрғын үйдің аумағын дайындап, ауыр техникалардың күшімен жертөле аумағын тазартып, жаңа баспаналардың іргетастарын құюда. Аудан әкімінің орынбасары мердігер серіктестік тарапынан жүргізіліп жатқан құрылыс жұмыстарының сапасымен танысты. Ауа райының қолайлылығын барынша пайдалануды көздеген құрылысшылар қарқынды жұмыс жүргізбек. Қажетті құрылыс материалдары жеткізілген.
Шағын қаладағы тұрғын үй мәселесі кезеңімен шешімін табатын болады.
Шар қаласында сондай-ақ Абай атындағы мектеп-балабақша кешені жөндеуден өтуде. Б.Самежанов «Алатау» жауапкершілігі шектеулі серіктестігінің өкілі Сандуғаш Өміртаевамен кездесіп, аталған жөндеу жұмыстарының барысымен танысты. Мердігермен жасалған келісімшартқа сәйкес, нысан қыркүйек айында қолданысқа берілмек.
Жұмыс сапары барысында аудан әкімінің орынбасары Б.Самежанов елді мекеннің санитарлық тазалығын да назарынан тыс қалдырмай, қала әкімімен бірге бірқатар көшелерді аралап шықты.
Айта кету керек, қаланың санитарлық тазалығы сын көтермейді, көшелердің қалтарыс тұстарында заңсыз жиналған қатты тұрмыстық қалдықтар әлі де азаймай отыр.
Б.Самежанов қала әкіміне санитарлық тазалық жұмыстарын жақсартуды және тұрғын үйлердің маңайына қоқыс төгетін азаматтарды анықтап, құқық қорғау органдарымен бірлесіп шаралар қолдануды тапсырды.
Аудан әкімінің орынбасары сонымен қатар Сұлусары ауылындағы орталық су желісі құрылысын да көріп қайтты. Қазіргі уақытта «Арай-НС» ЖШС елді мекендегі аулаларға су құбырын тартып жатыр. Алайда мердігер компания құрылыс жұмыстарын мерзімінен кешіктіруде. Аудан әкімінің орынбасары мердігерге жұмыс қарқынын арттыруды тапсырды. Ол үшін қосымша жұмысшылар алып, техникалардың санын көбейту керек.
Ал Қапанбұлақ ауылындағы Т.Хасенұлы атындағы орта мектепте салынып жатқан жылу қазандығының құрылысын Жарма аудандық мәслихатының төрағасы М.Оспанбаев, “AMANAT” партиясынан сайланған облыс мәслихаты депутаты Н.Қойжайғанов көріп қайтты. Құрылысқа жауапты мердігер компания «Алматы энергострой» ЖШС өкілінің айтуынша, бүгінгі күні жылу қазандығының құрылыс жұмыстары 20 пайызға орындалған, шілде айының 31-інде толықтай аяқтауды жоспарлап отыр.
Мердігер серіктестік негізгі құрылыс жұмыстарын бастауға дайындалуда. Келесі аптадан бастап құрылыс жұмыстарына кіріседі. Жақын арада жаңа жылу қазандығы жеткізіліп, оны құрастыруды қолға алмақ. Қосалқы құрылыстар да қатар жүреді.
Сұлусары ауылындағы орталық су желісі құрылысын халық қалаулылары да бақылауға алған. Құбыр тарту жұмысы тұрақты жүргізіліп жатқанымен, жер асты суының көтерілуі құрылыс барысына өз әсерін тигізуде. Дегенмен депутаттар жалпы жағдайды бағамдай келе мердігер серіктестік өкілдеріне нысанның уақытында тапсырылуы тиіс екенін ескертті. Құрылыс барысы тұрақты түрде партия бақылауында болады.
«ST»- ақпарат
