Ішкі істер министрлігі түнгі клубтар мен барлардың жұмыс уақытын шектеу туралы ұсыныс айтты. Бірақ астаналық кәсіпкерлер бұған қарсы шықты. Бұл туралы Stan.kz ақпарат агенттігі 31-арнасының Информбюро жаңалықтар бағдарламасына сілтеме жасап хабарлайды.
Кәсіпкерлердің айтуынша, мұндай шектеу шағын және орта бизнеске зиян тигізеді. Көңіл көтеру орындарының басшылары бес-алты сағаттың ішінде пайда тауып үлгермейтіндерін айтты.
ІІМ-де тұрғын үйлердің бірінші қабатындағы түнгі клубтардың жұмысын 23:00-ге дейін, ғимараты жеке тұрған клубтарды түнгі екіге дейін қысқарту туралы ұсыныс айтылды.
Кәсіпкерлердің айтуынша, көпшілік көңіл көтеру орындарына тек кешкі алтыдан кейін барады. Ал бес сағатта айтарлықтай пайда табу қиын. Ол қауіпсіздік талаптарын сақтау туралы қатаң шаралар қолдану жеткілікті екенін айтады.
“Егер 11-ге дейін уақытын қысқартатын болса, онда табыс көзі азаяды. Соған сәйкес көп қызметкерлерді жұмыстан шығарып, қысқартуға тура келеді. Сондықтан бұған қарсымын”, – дейді кәсіпкер Жанболат Закиров.
Ол тыйым қоғамдық қылмысты азайтпайды дейді. Керісінше жастардың демалатын, көңіл көтеретін орны болмаған соң, тәртіп бұзылатынын айтты.
Бұл бастамаға халықтың пікірі екіге бөлінді, бірі қолдаса, екіншісі қарсы шықты. Бастысы азаматтардың қауіпсіздігіне жауап беру маңызды дейді. Себебі түнгі клуб пен барлардың тең жартысында мамандандырылған күзет қызметі мен қауіпсіздік шаралары сақталмаған.
Ішкі істер министрлігінің мәліметінше, Астанада түні бойы жұмыс істейтін көңіл көтеру орындары мыңнан асады. Онда қауіпсіздік шаралары сақталмағандықтан, ащы суға тойып алып тәптіп бұзған, суық қару алып кіріп, жанжалды жағдайлар орын алады.
“Таңға дейін жұмыс істейтін көңіл көтеру орындары криминогендік ахуалды алаңдатып отыр. Жыл басынан Астанада осындай орындардағы тәртіп бұзушылық бойынша төрт мыңнан артық қоңырау келіп түскен. Сол себепті департамент осындай жағдайлардың алдын алу үшін тиісті заңнамаға өзгерістер әзірлеуді ұсынды”, – деп мәлімдеді Астана қаласы полиция департаментінің баспасөз хатшысы Эльмира Шауленова.
Түнгі клубтар мен барлардың жұмыс кестесіне қатысты соңғы шешімді қалалық мәслихат депутаттары мен жергілікті билік өкілдері қабылдайды.
