Кезінде басталған 2011-2020 жылдар аралығына арналған «Ақбұлақ» бағдарламасы шалғай жатқан ауылдық елді-мекендерге жетпей қалғаны белгілі. Тіпті депутаттардың да назарынан тыс қалып, ауыл тұрғындары сапалы, таза ауыз сумен қамтамасыз етілмеді. Сондай өңірдің бірі облысымыздағы Аягөз ауданы, Мамырсу ауылына қарасты Бозай елді-мекені еді. Бұл ауылда бар-жоғы 95 түтін тұрады, жалпы тұрғыны 442 адам.
Осыдан екі жыл бұрынғы Қазақстан Республикасы Парламент Мәжілісі, облыстық және аудандық мәслихаттар депутаттарын сайлау кезінде Шығыс Қазақстан облысы Аягөз ауданынан облыстық мәслихатқа депутат болып сайланған Қанат Рысбекұлы Оспанов Бозай елді-мекенінің тұрғындарымен кездескенде осы ауыз су мәселесі көтерілген еді. Сол кезде халық қалаулысы су желілерін тартып, тұрғындарды сапалы ауыз сумен қамтамасыз етуге уәде берген екен.
Биыл Парламент Мәжілісі мен жергілікті мәслихат таратылып, жаңадан сайланған болатын. «Уәде — серт болар» демекші, атымтай жомарт азамат Бозай жұртшылығына берген уәдесін ұмытпапты. Қанат Рысбекұлы қайта депутат болып додаға түспесе де, «Ер жігіттің екі сөйлегені өлгені» дегендей, айтқан сөзінде тұрыпты.
Биыл көктемде аталмыш елді мекенге өз қаражаты есебінен 43 үйге ауыз су тартып берді.
— Атқамінерлердің назарынан тыс қалсақ та, Қанат Рысбекұлы сияқты атымтай жомарт азаматтар бар екені қуантады, — дейді ауыл тұрғыны Дәулет Есентеміров. — Талай жылғы жан айқайымызды естіп, әр үйге ауызсу жеткізіп берді.
“AMANAT” партиясының Абай облыстық филиалы
