Елімізде қазан айының алғашқы жексенбісі күні ұстаздар мерекесі атап өтіледі. Ұрпақ сабақтастығы жолында ерінбей еңбек еткен қауым үшін ескерілетін мереке Семей қаласында биыл да жалғасын тауып, қаламыздағы балалар мен жастардың шығармашылық сарайында білім бөлімінің ұйымдастыруымен ұстаздар күніне арналған салтанатты іс-шара өткізілді.
Атаулы мерекеге қала әкімінің орынбасары Зәуреш Исабаева, қалалық білім бөлімінің басшысы Гүлжан Алтынбекова, білім қызметкерлерінің қалалық кәсіподақ ұйымының төрайымы, ардагер ұстаздар, білім мекемелерінің басшылары, қоғамдық ұйымдар өкілдері, халық-аралық, республикалық және облыстық сайыс-тардың жеңімпаздары қатысты.
Салтанатты жиында алғашқы сөз кезегін алған Зәуреш Рамазанқызы ұлағатты жандарды қала әкімі Айбек Кәрімовтің атынан төл мерекелерімен құттықтады.
— Ұстаз болу — жүректің батырлығы. Халыққа қара танытып, жас ұрпақтың бойына білім дарытатын ұстаз мамандығы ардақты әрі қадірлі. Сіздердің еңбектеріңіз ешқашан ұмытылмайды, істеріңіз игілікке толы. Тәуелсіз елдің ұрпақтарын оқу-білімге үйреткен өздеріңіздей ұстаздармен біз қашанда мақтанамыз. Ұлтымыздың ұлы тұлғасы Ахмет Байтұрсынов: «Ұлттың ұлағаты мәдениетте. Мәдениеттің ұлағаты оқу мен әдебиетте», — деген болатын. Бұл халқымыздың, Алаш арыстарының арманы болатын. Сол арманға қол жеткізіп отырған тәуелсіз қазақ елі дамудың даңғыл жолына түскен. Елбасымыз, бәсекеге қабілетті елдер қатарына ену үшін, сауаттылығы жоғары елге айналуы қажеттілігіне ерекше назар аударуда, — деп атап өтті Зәуреш Рамазанқызы.
{jcomments on}Сауатты, білімді ұрпақ тәрбиелеуде ұстаздардың рөлі ерекше екенін атап өткен қала әкімінің орынбасары 2011-2020 жылдарға арналған білім беруді дамыту бағдарламасы аясында бүгінгі күні қаламызда білім берудің жаңа бағыттары айқындалып, тың бастамалардың іске асып, мектепке дейінгі, негізгі және кәсіптік — техникалық білім беру стандарттарына сәйкес жыл сайын материалдық — техникалық базаның жаңартылып, толықтырылып отыратыны жайлы да жиналғандарға мағлұмат беріп өтті. Сонымен қатар, қала оқушыларының халықаралық, республикалық, облыстық додаларда Семейдің атын асқақтатып, жүлделі орындармен оралатындықтарына тоқталып, бұл оқушылардың армандарына қанат бітірген ұстаздар қауымының тынымсыз еңбегінің нәтижесі екендігін айтты.
1-2 қазан күні Беларусь астанасы Минскіде барлық ТМД елдерінің ұстаздарының ІІІ съезі болған. Съезге біздің елімізден қалалық білім бөлімінің басшысы Гүлжан Алтынбекова қатысып қайтқан. Ұлағатты жандардың салтанатты басқосуында Гүлжан Қайырханқызы «Ұрпағы білімді халықтың болашағы жарқын болары сөзсіз. Жас ұрпаққа білім мен тәрбие беруде ұстаздардың алатын орыны үлкен» деген орамды ойын ортаға салып, мұғалімдер съезінде көтерілген мәселелер, білім саласын әрмен қарай дамыту жайына тоқталды.
Салтанатты жиын барысында қызметте үздік нәтижеге қол жеткізген қаланың 100 ұстазы «Бас- қарудағы шеберлігі», «Мақсатшыл және еңбексүйгіштік», «Педагогикалық бастамашылдық», «Шығармашылық ізденіс», «Кәсібіне адалдық», «Өз ісінің шебері», «Еңбексүйгіштігі мен мақсаткерлігі үшін» аталымдары бойынша марапатталып, дипломдар мен бағалы сыйлықтарға ие болды. Шараға қатысқан білім саласының ардагерлері жүрекжарды лебіздерін білдірді. Ұстаздардың кәсіби мерекесіне арналған салтанатты жиын балалардың шығармашылық ұжымдары дайындаған мерекелік концертке ұласты.
Әйгерім СӘРСЕНҒАЛИ, «Семей таңы»
