Бүгінде азық-түлік бағасын тұрақтандыру — басты мақсат. Бұл орайда қала әкімі Айбек Кәрімов азық-түлік бағаларын бақылауға алып, оның көтеріліп кетпеуіне аса көңіл бөліп отыр. Айбек Мүталапханұлы Семей қаласына іргелес аудандардың бірқатар ірі-ірі шаруа қожалықтарына Семейде арнайы сауда орындарын ашып, табиғи таза өнімдерін тұрғындарға тікелей жеткізуге жағдай жасап, бастамашы болған еді. Осы бастама бүгінде алғашқы жемісін бере бастады. Алғаш болып аудан- дарға қарасты сауда үйін Бородулиха ауданы шаруа қожалығының иесі Александр Майер ашты. Енді Семей қаласының оң жағалауында орналасқан «Родина» сауда үйі тұрғындар үшін қызмет көрсетпек. Сауда үйінің ашылу салтанатына қала әкімі Айбек Кәрімов қатысты.
Қаламыздағы Қаржаубай-ұлы көшесі, 249/1 мекенжайында бой көтерген сәулеттік дәрежесі жоғарғы заман талаптарына сай азық-түлік сауда үйі енді тұрғындардың сұранысын қамтамасыз ететін болады. Мұнда сатып алушылар мен қызметкерлерге барынша жағдай жасалыпты. Сауда үйінің салқындату әрі ауа алмастыру, жылыту жүйелері стандарттарға сай келетін құрылғылармен жабдықталған.
— Өздеріңіз көріп тұрғандай, сауда үйінде ауылшаруашылығы өнімдері саудаланады. Әртүрлі ет өнімдері, құс еті, бал, өсімдік майы мен нан өнімдері сынды тауарлар бар, — деп сөзін бастаған қалалық кәсіпкерлік бөлімінің басшысы Марат Нүгеров, — осылайша, Семейде азық-түлік бағасын тұрақтандырып тұруға мүмкіндік беретін тағы бір сауда орны ашылып отыр. Әсіресе, ет өнімдерінің бағасы тұрақты. Бұған дейін қаланың бұл ауданында осындай ірі сауда үйі болмаған еді. Қала әкімі Айбек Кәрімовтің бастамасын Бородулиха ауданының кәсіпкерлері тиімді пайдаланып, біріншіден, халыққа қызмет көрсетсе, екіншіден, өз өнімдерін тікелей, алып сатарларсыз өткеруге мүмкіндік алып отыр, — дейді Марат Нүгеров.
{jcomments on}Сауда үйі ашылған сәттен бастап келушілер қызу саудаға кірісті. Бұған қоса, кез келген тауар зертханадан өткізіліп, тексеріліп тұрады. Кәсіпкерлік бөлімінің басшысы Марат Нүгеровтің айтуынша, алдағы уақытта қалада осы ауданға тиесілі «Зайтенов» шаруа қожалығының сауда үйі ашылмақ. Сауда үйі қала орталығында орналасады деп жоспарлануда.
— Азық-түлік тауарлары базар бағасына қарағанда, айтарлықтай төмен. Сол себепті де сауда өте қызу жүріп жатыр деп айтуға болады. Оны тұрғындар ризашылығынан да білуге болады. Бұған қоса, барлық тауарлар тиісті зертханалардан өткен. Алдағы уақытта қала орталығында тағы бір осындай сауда орны ашылады. Осылайша, біз тұрғындар тұтынатын негізгі азық-түлік түрлеріне деген бағаны тұрақтандыра аламыз, — дейді М.Нүгеров.
Айта кетуіміз керек, сауда үйінде ортақ келісім бойынша Семей өңіріне қарасты шаруалар да өз өнімдерін тұрғындарға ұсына алады. Мұнда әзірге шаруаларға арналған 11 орын қойылған, алдағы уақытта оның қатарын 25 орынға дейін арттыру жоспарланып отыр. Қазір болашақта ашылатын өзге де сауда нүктелерінің жобалары қарастырылып жатыр.
Ауылдық жерден таза табиғи өнім әкеліп саудалап жүргендердің бірі — Бородулиха ауданына қарасты Зубайр ауылдық округінің тұрғыны Үміт Жүсіпова. Үй шаруасын дөңгелетіп отырған ауыл тұрғыны заман талабына сай сауда үйінің ашылғанына дән риза.
— Семейліктерге сүт, қаймақ, май, құрт, ірімшік өнімдерін алып келдім. Бұл сауда үйі ыңғайлы болады деп ойлаймын. Аудан үшін де өте тиімді. Алдағы уақытта да келіп, өнімдерімді семейліктерге ұсынып тұратын боламын,- дейді Үміт Жүсіпова.
Бородулиха ауданынан келген шаруаның бірі — аудан тұрғыны Светлана Тупкина. Бал өнімдерін әкеліп отырған ол омарта шаруашылығымен 12 жыл айналысатынын айтады. Омарташы қазір жеке кәсіпкер ретінде қызмет етуде.
— Ұсынып отырған бал өнімдері табиғи таза деп толық айта аламын. Арнайы рұқсат құжаттарым да бар. Жылда егіс алқаптарында, орманды жерлерде тұрамыз. Әзірге қарақұмықтан және әртүрлі шөптерден алынып отырған екі түрлі бал өнімін алып келдік. Балды көтерме сауда құнымен саудалаудамын. Бір келі бал — 800 теңге. Бұған дейін базарлар мен жәрмеңкелерге шығып тұратынмын. Сондай-ақ, көтерме сатып алушылармен жұмыс жасаймын. Сауда жүретін болса, осы жерге келіп тұруға болады. Өйткені өте ыңғайлы,- дейді Светлана Тупкина.
Асан МЫРЗАХАНОВ, «Семей таңы»
