Семейде әлеуметтік нысандарға 15 қазан — жылу беру маусымын күтпей-ақ жылу беріле бастады. Бұл туралы сейсенбі күні «Жылукоммунэнерго» мекемесінің жылу инспекциясы бөлімінің басшысы Жұман Мусин БАҚ өкілдеріне арнайы мәлімдеді.
Күннің күрт салқындап кеткенін ескерген қала басшылығы «Жылукоммунэнерго» мекемесіне 15 қазанды күтпей-ақ жылу беруге тапсырма жүктеген. Әсіресе, әлеуметтік мекемелер бірінші кезекте жылумен қамтамасыз етіліп, сейсенбі күні алғашқы жылу беріле бастады.
— Ауа райына байланысты қазан айы- ның алғашқы күндері жылу беріле бастады. Жылу берудің де өз тәртібі бар. Бірінші ретте ауруханалар мен емдеу мекемелері, балабақшалар мен мектептер жылумен қамтамасыз етіледі. Одан кейін тұрғын үйлер мен кәсіп-орындардың да кезегі келеді. Қазіргі таңда №1 ЖЭО-ның қазандығынан жылу беріліп жатыр. Ыстық судың берілуі де назардан тыс қалған жоқ. 35 және 342 ықшамаудандарда ыстық су берілуде. Шаһардың сол жағалауына, өзге бөліктеріне де жылу мен ыстық су кезегімен беріледі,- деді «Жылукоммунэнерго» мекемесінің жылу инспекциясы бөлімінің басшысы Жұман Мусин.
Айта кетерлік бір жайт: тұрғын үйдің жылу маусымында дайын екендігін растайтын арнайы құжаты болмаса, ол үйге жылу берілмейді. Әр тұрғын үй бұл құжатты алу үшін тұрғын үй инспек-циясы мен «Семей-Водоканал» МКК, «Жылукоммунэнерго» МКК-нің белгілі бір талаптарына сай болуы керек. Сонымен қатар, жылуға қарызы қордаланып қалған үйлер де жылудан қағылатын болады. Семей қаласы тұрғындарының жылу беру мекемесіне берешегі 300 млн. теңгеден асып отыр. Ал ұйымдар мен кәсіпорындардың «Жылукоммунэнерго» мекемесі алдындағы қарызы 100 млн. теңгені құрайды.
{jcomments on}- Қазіргі таңда жалпы 177 үйдің 108 млн. дебиторлық қарызы бар. Әр үйдің, әр пәтердің қандай мөлшерде берешек екендігі жайлы мәлімет қолымызда. Сол бойынша әрекет етеміз. Егер тұрғын үй берешектер қатарында болса, жылу маусымына дайындығы туралы құжаты болмаса, оларға жылу бе-рілмейді,- деген Жұман Мусин жылу беру мекемесіне де қаржының аса қажеттігін айтады. Жұман Мусиннің айтуынша, «Жылукоммунэнерго» мекемесінің борышкерлерден қарыздарын төлеуді талап етуі орынды. Қызмет көрсетуші кәсіпорын жұмысшыларына маусым айынан бері жалақы бере алмай отыр. Сонымен қатар, қысты толық өткеру үшін, қосымша көмір қорын толықтыру мәселесі де бар. Жылу берілген соң, күн санап тұтынушылардың дебиторлық қарызы көбейсе, онымен қоса кәсіпорынның су, жарық беретін өзге де кәсіпорындар алдындағы берешегі де арта түспек.
Бұл тығырықтан шығатын жалғыз жол — борышкерлер түсіністікпен қарап, қордаланған қарыздарын тез арада төлеулері керек. Қылышын сүйреткен қыс та қыр астында. Әлбетте, көрсетілген қызметтің ақысын төлеу заңдылық болса, оны уақтылы төлеп тұру — азаматтық парыз.
Әйгерім СӘРСЕНҒАЛИ, «Семей таңы»
