«Семей таңы» басылымын бала кезімнен оқып келе жатырмын. Ертеректе, мектептің жетінші сыныбында оқып жүрген кезімде алғашқы өлеңсымағымды жіберіп, белгілі журналист Ғазиз Сапаев ағамыздың сол кезде келіп түскен бір топ өлеңге сараптама жазған материалында қатты сынға ұшырағаным да бар. Кейіннен біраз жылдар, сирек болса да, аздап жазған дүнием «Семей таңының» бетіне жарияланып та жүрді. Адам әдетте өзіне ұнаған баспаларды оқиды да, қолынан бірдеңе келсе, жазған дүниесін де соған жібереді емес пе? Содан өзі де сол газеттің тұрақты оқырманы болғанын байқамай да қалады екен. Мен де қара шаңырақ — Семей таңының ұзақ жылғы тұрақты оқырманымын.
Бүгінде көпшілікке кеңінен таралып отырған осы газет несімен маған ұнайды десек, ол, ең бірінші, қоғамда болып жатқан жаңалық, өзге-рістерді, кейбір анда-санда бір шығатын баспалар сияқты басқалардан қайта көшіріп емес, дәл уақытында оқырманына жеткізіп отырады. Кейде радио, теледидармен қатарлас, тіпті бұрын, озып та жазып жататыны бар. Екіншіден, шалғай ауылдардың тыныс — тіршілігін нақты, айқын, ашық жазғанда, кей материалды оқып отырған адам сол елдімекенге өзі барып, көзімен көргендей әсер алып қалады.
{jcomments on}Баспаның бас редакторы көп жағдайда басшы ғана емес, журналист ретінде әр салаға өзі де қалам тартып жатады, бұл газеттің журналистеріне серпін беріп, оларға қанат бітіріп, шабытын жани түсіретініне дау жоқ. Газеттің күннен-күнге безендірілуі жетіліп келе жатқанын да айтқан жөн болар. Ең бастысы, «Семей таңы» рухани мәселелерді, қоғамды алаңдататын жайттарды үнемі жариялап отырады. Оның ішінде елдің барлығы онша хабардар емес жайттарды да ұмытпайды.
Мәселен, ұлы Абайдың ұрпақтарына қатысты үстіміздегі жылы басылымның 9 қыркүйек күнгі № 71 санында жарияланған мақаласында Р.Молдашева өзі бастап алаңдаушылығын білдіріп жатқаны оқырманды бей-жай қалдырмайды деп ойлаймын. Міне, осындай материалдар арқылы газетті көпшіліктің ұнатып оқитыны сөзсіз.
«Семей таңының» мерейі биік, қаламы ұшқыр, ғұмыры ұзақ болуын тілеймін!
А. ТІЛЕУБАЕВ, Семей қалалық Достық үйінің директоры.
