ШҚО әкімі Бердібек Сапарбаевтың тікелей бастамасымен іске асып жатқан «Туған ел – алтын бесігім» акциясының күн өткен сайын өзінің маңыздылығы артып келе жатқаны жасарын емес. Әсіресе, облысқа қарасты аудандар мен қалалардың өр Алтайдың төріндегі Өскемен қаласында апта сайын өтетін бір ғана ауылшаруашылығы жәрмеңкесінің өзі дәстүрлі түрде ұйымдастырылып, ұтымдылығын көрсетуде. Әлбетте, ұтымдылығы дегенде, қала тұрғындарының табиғи өніммен қамтамасыз етілуін баса айтуға болатындай.
Алты ай жаз маңдай терін төгіп, Жер-Ананың игілігін икемді пайдаланған шаруаның қоңыр күзде жиын-терімін алыпсатарсыз тікелей саудалауға мүмкіндік алуымен де жәрмеңкенің шаруаға тигізер жәрдемі бар. Әлбетте, қала тұрғындарының да ауылдағы ағайынның қолымен өндірген өнімін алып, табиғи азық-түлік тұтынатын тиімділігі өз алдына. Міне, осындай мақсаттарға орайластырылған ауылшаруашылығы жәрмеңкесінің, қай тұрғыдан алсақ та, берері мол.
Өскеменде өткен жылдары да өз деңгейінде ұйымдастырылған Семей қаласының ауылшаруашылығы жәрмеңкесі биыл да сол биіктен көрініп, облыс орталығында өткен сенбіде өткен жәрмеңке өскемендік жұртшылықтың көңілінен шықты.
{jcomments on}«Қыстың қамын жаз ойла» демекші, қоңыр күз келсе, Өскемен жұрты ерекше қуанады. Себебі, биыл да ауыл тұрғындарынан келген арзан өнімдерді тұтынады. Сол себепті жәрмеңкеге келушілер қарасы әдеттегіден мол. «Fresh market» сауда орталығы маңында өткен ауылшаруашылығы жәрмеңкесіне Семей қаласына қарасты 16 ауылдық округтерден шаруалар қатысты. Жәрмеңкеге Семей қаласы әкімінің орынбасары Зәуреш Исабаева арнайы барып, сатылымдағы өнімдердің бағасымен танысты.
Бағаны тұрақтандыруға септесетін осындай жәрмеңкелердің қалалықтарға пайдасы мол. Себебі тұрғындар бұл жерден қажет еткен өнімін төмен бағамен сатып алды. Семей қаласының ауылшаруашылығы және ветеринария бөлімінің басшысы Әнуарбек Сүйчиновтың айтуынша, жәрмеңкеге жалпы көлемде 5 тонна сиыр еті, 2,5 тонна қой еті, 600 келі жылқы еті, 45 тонна картоп, 27 тонна көкөніс өнімдері және басқа да халықтың сұранысына сай өнімдер ұсынылған.
— Облыс орталығына сегіз тонна ет өнімдері жеткізілді. Сондай-ақ, қымыз, май, құрт саудаланып жатыр. Жергілікті тұрғындар ауылшаруашылық өнімдерін қуана алып, ризашылықтарын білдіруде. Ауа райы да өте жақсы. Дәстүрлі жәрмеңке биылғы жылы да ерекше өтуде деп айтуға негіз бар, — дейді Әнуәрбек Қазисұлы.
Жәрмеңкеге Семей қаласына қарасты 16 ауылдық округтің шаруалары келіп, өздерінің арзан әрі сапалы өнімдерімен өскемендіктерді қуантты. Бұл күні саудасы ерекше қызған өнім деп көкөністі атауға болады. Озерка ауылдық округінің әкімі Бақытжан Нұғымановтың айтуына қарағанда, олар төмен бағада картоп пен қырыққабатты саудалапты.
– Семейден келген 16 ауылдық округтің 12-і ет өнімдерін әкелді. Таңертеңнен бері картоп тез өтіп кетті. Сондай-ақ, қырыққабаттың келісін ең төмен бағада, 40 теңгеден сатып жатырмыз. Халық жылы қабылдап, ризашылықтарын білдіруде. 7 тонна көкөніс алып келген болатынбыз, барлығын да тұтынушылар көтере алғанынша алды. Өскемендіктер ауылдан жеткізілген қымызымызды да жоғары бағалады. Өздеріңіз көргендей, жәрмеңкеге көптеп келген халықтың саудаға ықыласы ерекше, — дейді Озерка ауылдық округінің әкімі Бақытжан Нұғыманов.
Күз келгенде, қала базарының нарығы мен жәрмеңке өнімдері бағаларының теңелуі қалыпты құбылыс. Себебі дәл осы мезгілде еңбегінің жемісін көретін шаруалар бәсекесі қала базарының нарығын тұрақтандыруға оң әсерін тигізеді. Жәрмеңкеге «Семей ет комбинаты» ЖШС өз өнімдерін алып келді. Сауда өкілінің айтуынша, комбинат осындай жәрмеңкелерден қалыс қалмауға тырысады.
— Осындай жәрмеңкелердің дәстүрлі түрде өткізіліп тұрғанын құптаймыз. Өйткені, халыққа өз өнімдерімізді таныстыруда жәрмеңкенің пайдасы мол. «Семей ет комбинаты» ЖШС Қазақстан бойынша жұмыс жасайды. Әсіресе, ет консервісі мен шұжық өнімдеріне сұраныс өте жоғары. Бүгінгі жәрмеңке жақсы өтуде, халық та көптеп жиналыпты. Өнімдерімізді көріп, алып жатыр. Айта кетуіміз керек, шұжық өнімдерінің сапасы ешбір шетелдік өнімдермен салыстыруға келмейді. Сапасы өте жоғары. Ал нарықтағы құны Қазақстан бойынша бірдей, — дейді «Семей ет комбинаты» ЖШС сауда өкілі Надежда Кучми.
Жәрмеңкеге ет өнімдерін алып келгендердің бірі — Озерка ауылының «Салтанат» шаруа қожалығы. Қожалық басшысы Салтанат Икимбаева әкелген барлық өнімдерін сатып үлгергенін айтады.
— Шаруа қожалығын ашып, жұмысымды бастағаныма 10 жыл болды. Негізінен ірі қара өсірумен айналысамыз. Осыдан екі жыл бұрын мемлекеттен несие алып, мал басын көбейтіп алдық. Алдағы уақытта тағы да мал басын көбейтіп, біраз шаруалар атқаруды жоспарлап отырмыз. Бүгінгі жәрмеңкеге үш бас ірі қара алып келіп, барлығы саудаланып кетті. Жәрмеңке жақсы ұйымдастырылған екен. Алдағы уақытта да осындай шаралардан қалмайтын боламыз, — дейді Салтанат Икимбаева.
Осындай жәрмеңкелердің пайдасын дәлелдеп жатудың өзі артық. Өскемендіктер тұтынушы мен тауар өндірушіге де тиімді болып отырған мұндай шаралардың алдағы уақытта да ұйымдастырыла бергенін қалайды.
— Осындай жәрмеңкенің ұйымдастырылуы, әрине, өте жақсы. Өскемендіктер ауылдан келген таза экологиялық және арзан өнімдерді қуана алып жатыр. Үлкен кезекке тұрып, 1 қап картоп алып үлгердім. Қазақтың ұлттық сусыны қымыздан да алдым. Оны жолдасым өте жақсы көреді, — дейді Светлана Владимировна.
Ал жәрмеңке болады дегенді естіп бірінші келген қала тұрғыны Ғалия Есенқызы тұтынушылардың сұранысына сай өнім әкелген Семей қаласы шаруаларына дән риза.
— Жәрмеңке болып жатыр дегенді естіп, осында жылдам жеттім. Негізі ет алуға келген едім. Алайда көкөністің де арзан екенін көріп, сарымсақ пен картоп сатып алдым. Әрине, бағасы базардағыдан әлдеқайда төмен. Міне, өзіңіз көріп тұрғандай, қазы сатып алдым, — дейді Ғалия Есенқызы.
Айта кетуіміз керек, осы күні Шығыс Қазақстан облысы күні аясында Астана қаласында ауқымды жәрмеңке өтті. Елордадағы Шығыс Қазақстан облысы күніне бір ғана Семей қаласынан 80 тонна көкөніс жіберілген. Жалпы, Шығыс Қазақстан облысынан апарылған 450 тонна ауылшаруашылық өнімдері төмен бағамен саудаланған. Өскемендегі жәрмеңкені ән мен бидің көркін қыздырған Семей қаласының өнерпаздары көңілді концертке ұластырды.
Асан МЫРЗАХАНОВ,
«Семей таңы»
