Қызылорда облысының Жаңақорған ауданындағы мектептің бір топ мұғалімі басшыларына қарсы шықты. Айтуларынша, директордың орынбасары Шәркүл Сәрсенова ұстаздарға оқушылардың көзінше ұрысып, қоқан-лоқы көрсетеді. Бұл туралы Stan.kz ақпарат агенттігі 31-арнаның Информбюро жаңалықтар бағдарламасына сілтеме жасап хабарлайды.
Жаңақорған ауданындағы №110 мектептің директорының орынбасары мұғалімдерден ақша жинайды дейді. Мұғалімдер бұл туралы білім басқармасына бірнеше рет айтса да, еш нәтиже жоқ. Сол себепті олар құзырлы органдарға жүгінген.
Айтуларынша, оқу жылының басында сағаттық жүктемелерін көбейту үшін орынбасарға ақша береді. География пәнінің бес мұғалімінің жалақысын өзіне қайтарып беруді сұрады деп отыр.
“Дәптердің ақшасын қайтаруымыз керек. Осындай бап бойынша бізге ол ақша төленбейді. Қателікпен жазып қойыппын, ақшаны қайтаруымыз керек дейді. Ақшаны қолма-қол немесе карта шотына аударасыңдар деді. Неге сүйеніп қайтаруымыз керек? Ешқандай бұйрық жоқ”, – деді география пәнінің мұғалімі Айдана Төлегенова.
“Айтпаған сөзі қалмады. Жерден алып, жерге салады. Тіпті күйеуімізден олай қорықпаймыз. Мектепке кіріп жатқанда, кәлимамызды айтып кіреміз. Қатты қорқамыз”, – деді орыс тілі пәнінің мұғалімі Нұрзада Мәтішева.
Үрейі ұшқан ұстаздар оқу ісі жөніндегі орынбасардың қысымынан шаршаған. Шәркүл Сәрсенованың өзі бір топ ұстаздың шағымымен келіспейді. Ол қызметкерлерге тек жұмыс бабымен ескерту айтатынын түсіндірді. Сондай-ақ олардан негізсіз ақша алған кезім болмаған деп отыр.
“Сағатты мен бөлмеймін. Оны бірлестік жетекшілері бөледі. Сағатты бөліп, бірлестік жетекшілері барлығы қол қойып бергеннен кейін маған әкеліп береді. Оны сабақ кестесіне қоямын. Анау айтып отырған сомаңызбен келіспеймін”, – дейді №110 орта мектеп директорының орынбасары Шәркүл Сәрсенова.
Білім бөлімінің басшылары бұл мәселеден бұрыннан хабардар. Алайда ұстаздардың шағымына енді назар аударылыпп жатыр.
“Қазір ұжыммен кездесіп, сөйлесемін. Не мәселе болып жатырғанын сұраймын. Сол жерде педагогикалық әдеп кеңесі бар, егер айтқан сөздер расталатын болса, бұл кісінің тиісті шарасы қабылданады”, – деді Жаңақорған аудандық білім бөлімі басшысының міндетін атқарушы Нұрлан Дәулетәлиев.
Ұстаздар оқу ісі жөніндегі орынбасардың орнын босатқанын талап етуде.
