Кеше, 5 маусым күні, облыс әкімі Нұрлан Ұранхаев өңір журналистикасының дамуына үлес қосып жүрген сала мамандарын марапаттады. Салтанатты шараға ардагер журналистер, облыстағы БАҚ өкілдері қатысты. Абай облысының әкімі Нұрлан Ұранхаев БАҚ өкілдерін құттықтап, жүрекжарды лебізін білдірді.
Айкөркем МАҚЫШ,
«Semeı tańy»
— Сіздерді кәсіби мерекелеріңіз – бұқаралық ақпарат құралдары қызметкерлерінің күнімен құттықтаймын! БАҚ саласында қоғам жанашырлары, заманауи оқиғалар мен тарихи жағдайды объективті түрде қалың бұқараға жеткізе білетін өз саласының майталмандары еңбек етеді. Сондықтан жаңалықтың жаршысы, жақсылықтың хабаршысы болып қоғамдағы өзекті оқиғалардың алдыңғы шебінде жүретін айрықша кәсіп иелерінің қызметі қадірлі де құрметті.
Киелі Абай елінің журналистикасы республиканың БАҚ редакциялары үшін үздік кадрлар ұстаханасы болып саналады. Өңірімізде қарымды қаламгерлер қалыптастырған дәстүрді кейінгі толқын журналистер де лайықты жалғастыруда.
Сіздер облыстағы жаңалықтарды салмақты сөзбен, салиқалы пікірлеріңізбен жеткізіп, халықтың жүрегіне жол тауып келесіздер. Осы бағыттағы жұмыстарыңыз еселене берсін! – деді облыс басшысы.
Құттықтау сөзінен кейін Нұрлан Тельманұлы Абай облысы әкімінің жүлдесі үшін ұйымдастырылған журналистер байқауының жеңімпаздарына жүлделерін табыс етіп, БАҚ редакцияларын марапаттады.
Алаш арыстарының қолтаңбасы қалған киелі қара шаңырақ «Семей таңы» газетінің ұжымы өңір журналистикасын дамытуға қосқан үлесі үшін қаржылай сыйлыққа ие болса, басылым тілшісі Жадыра Төлегенқызы «Мерейлі отбасы» номинациясымен марапатталды.
«ABAI AIMAQ MEDIA» медиахолдингі құрамындағы «Вести Семей», Бородулиха аудандық «Жаңа уақыт», «Новое время» және Бесқарағай аудандық «Біздің Бесқағай», «Наш Бескарагай» газеттері ұжымдарына да құрмет көрсетілді. «Вести Семей» газетінің тілшісі Шынар Рысакова «Ақпарат саласының үздігі» төсбелгісіне ие болды.
«Біздің Бесқарағай» газетінің редакторы Әйгерім Сәрсенқали «Ауылды дамыту – басты міндет» номинациясы бойынша облыс әкімінің сыйлығына ие болды.
Барлық марапат иелерін құттықтаймыз!
