Қазақстандық боксшы, әлем және Азия чемпионатында топ жарған, 2008 жылғы Бейжің Олимпиадасының қола жүлдегері Еркебұлан Шыналиев медальдары мен атақтарын мұқтаж отбасыға сыйлады, деп хабарлайды Uaqyt.info.
Журналист Нұрсейіт Жылқышыбайдың Youtube-тегі «Уақыт көрсетеді» бағадарламасына берген сұхбатында Еркебұлан Шыналиев ел күтпеген мәлімдеме жасады. Ол спортта жеңген медальдары мен қол жеткізген атақтарын мұқтаж отбасыға берді. Шыналиев осы арқылы қайырымдылық жасағысы және өзін керексіз қылып сыртқа тепкен ел азаматтарына үндеу тастағысы келгенін айтады.
«Мен үшін мұның барлығы сақырлаған темір –терсек. Елімізде осындай мұқтаж отбасылар өте көп. Жәрдем бермейміз. Мына үйде 1-ші топтағы мүгедектігі бар бірнеше адам тұрады. Осы кісілерге қарап көңілім босап отыр. Қаржылай жағдайымыз жоқ болса да, сол арқылы осы отбасыға көмектескім келді. Оны бұрыннан ойластырып жүргенмін. Бұл кісілер ол атақтар мен медальдарды сата ма, төріне іліп қояды ма, өздері біледі», — деді боксшы.
Сұхбат барысында Шыналиев Олимпиададан кейін өзіне Шымкенттен сыйға берілген екі бөлмелі пәтердің де сол күйі берілмегінін жеткізді. Оның айтуынша, сол кездегі облыс және қала әкімдігі көзбояушылық жасап, кейіннен қолына азын-аулақ ақша ұстатып, мәселені жылы жаба салған.
«Шымкенттің барлық бұрышында пәтер жалдап тұрған шығармын. 2008 жылы әкімдік маған екі бөлмелі пәтер сыйға тартқан болтын. Они бірнеше телеарнадан көрсетті де. Бірақ кейіннен мені шақырып алып, қолыма 1,5 млн теңге берді. Ал пәтер сол күйі берілмей қалды», — деді Еркебұлан Шыналиев.
Бұдан бөлек Еркебұлан Шыналиев еліміздегі спорттағы олқылықтар мен өзінің жеке басына қатысты біраз мәселенің бетін ашты. Ол спорт саласында жұмыс істегісі келетінін, бірақ оған жол бермей отырған ел азаматтарының әрекетін сынады.
Сұхбаттың толық нұсқасын Youtube-тегі «Уақыт көрсетеді» бағадарламасынан көре аласыздар.
