«AMANAT» партиясының сайлауалды бағдарламасының Жол картасы шеңберінде Абай облысында іске асырылып жатқан нысандар қатарына 150 орындық мүгедектігі бар адамдарды абилитациялау және оңалту орталығын жатқызуға болады.
2021-2023 жылдар аралығына жоспарланған орталық биыл қолдануға берілді. Абай облысының мүгедектігі бар адамдарды абилитациялау және оңалту орталығының негізгі міндеті – тірек-қимыл аппараты бұзылған мүгедек балаларға, психоневрологиялық патологияларға, абилитация мен оңалтуды қажет ететін бірінші және екінші топтағы мүгедектігі бар адамдарға жағдай жасау.
Медициналық-әлеуметтік абилитацияға және оңалтуға құқығы бар азаматтардың санаты психоневрологиялық ауытқулары бар бір жарым жастан он сегіз жасқа дейінгі мүгедектігі бар балалар, тірек-қимыл аппараты бұзылған бір жарым жастан он сегіз жасқа дейінгі мүгедектігі бар балалар, психоневрологиялық аурулары бар он сегіз жастан асқан мүгедектігі бар адамдар, бірінші және екінші топтағы мүгедек адамдар жатады.
Орталық 8 бағыт бойынша жұмыс істейді. Оңалту орталығы технологиялық аймақтарға бөлу қағидалары мен балалар мен ересектерді кешенді медициналық-әлеуметтік, психологиялық-әлеуметтік және әлеуметтік-педагогикалық оңалтуды жүзеге асыратын және басқа қаладан келгендерге 1 айдан 6 айға дейін уақытша тұруға мүмкіндік беретін стационар және жартылай стационар жағдайындағы оқу-тәрбие мен медициналық оңалту мекемелерінің қажетті элементтерін қамтитын оңалту орталығының функционалдық процестерінің схемасына жауап береді.
Аталған орталық қызмет алушысы мүгедектігі бар адамдардың мәселесі бойынша Абай облысы әкімінің штаттан тыс кеңесшісі, үйлестіру кеңесінің мүшесі Руслан Ерембаев орталық жайлы ойымен бөлісті.
«Жаңа облыс болғалы оң өзгерістер байқала бастады. Соның бірі – көптен күткен мүгедектігі бар адамдарға арналған абилитациялау және оңалту орталығы. Бұл орталықтың басқа оңалту орталықтарынан ерекшелігі, біріншіден, заманауи үлгіде жасалуы, ал екіншісі – кішкентай балалар мен ересек адамдар бірыңғай келіп ем қабылдай алады. Бұрында біз басқа қалаға, облыс орталықтарына барып емделетін едік, ал енді осындай ерекше оңалту орталығы Семей қаласында да жұмыс жасауда. Оңалту қызметкерлерінің әрқайсысының өзіне жүктелген міндеттері бар, олар әр қызмет алушыға мұқият қарап, қадағалайды. Бөлімшеде бірнеше қараушылар, әлеуметтік қызметкерлер, мейірбикелер, дәрігерлер қызмет көрсетуде. Бұл орталықта қызмет алушыларға ем шараларынан бөлек мәдени іс-шаралар ұйымдастырылып, ән айту сабақтарына қатысу мүмкіндігі бар. Бір сөзбен айтқанда ішіңіз пыспайды. Осындай абилитация және оңалту орталығының салынғанына мемлекет басшысына, «AMANAT» партиясына және де жергілікті әкімдікке алғысымыз шексіз!» — деді Руслан Мақсұтұлы.
Барлық бөлмелер мен кабинеттер қажетті медициналық жиһаздармен және отандық және шетелдік өндірушілердің ең танымал және заманауи оңалту жабдықтарымен жабдықталған. Термогидротерапия бөлімшесінде екі емдік бассейннен тұратын емдік бассейндер қарастырылған. Спорт және акт залы бар. Қазіргі таңда орталықта 50 қызметті алушы бар.
«AMANAT» партиясының Абай облыстық баспасөз қызметі
