Сейсенбі, 19 шілде күні ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия жанынан құрылған сараптамалық топ мүшелері, ұлттық комиссия төрағасының орынбасары Ләззат Сүлеймен, ұлттық комиссия мүшесі Риза Молдашева қалалық және аудандық мәслихаттардың әйел депутаттарымен кездесті.
Кездесу барысында ауыл әйелдерінің мәселелері, қоғамдық-саяси өмірдегі әйелдердің үлесі мәселелері қаралды.
— Қазіргі таңда елімізде әйел депутаттардың саны артып, мәртебесі көтерілуде. Дегенмен де әйел депутаттардың талаптарына қолдау керек. Себебі қоғамның реттелуі әйелдерге байланысты. Халықтың депутаттарға деген сенімін нығайту қажет, — деді ұлттық комиссия төрағасының орынбасары Ләззат Жаңылысқызы.
Жиын барысында жас ұрпақ тәрбиесіне қатысты мәселе де көтерілді.
— Абай елі — Құнанбай, Абай, Шәкәрімді дүниеге әкелген ұлы аналардың ордасы. Осыдан бірер жыл бұрын басқа ұлттың тәрбиесіне таңсық көзбен қарайтын едік. Қазір тәрбиенің алшақтап кеткені көңіл қынжылтады. Тәрбиені шыңдау маңызды. Ұлттық тәрбие идеологиямызды айқындайды. Оның сұранысын арттыруға үлкен мән берілу қажет, — деді облыстық мәслихат депутаты Шағангүл Жанаева.
Түркістанда өткен Ұлттық құрылтайда қаралған мәселенің 80 пайызы тәрбиеге арналды. Жастарды ұлттық негізге сүйенетіндей, бәсекеге қабілетті болатындай жағдай жасау маңызды.
— Жастарға, заманауи трендтерді сақтай отырып, рухани мәдениетімізден алшақтамайтындай тәрбие беруіміз керек. Отбасылық тәрбиені нығайтуымыз қажет. Халықтың ниетін түзеуге әсер ететін негізгі күш әйелдер екенін ұмытпауымыз керек, — деді Ләззат Сүлеймен.
Әйелдер істері және отбасылық-демографиялық саясат жөніндегі ұлттық комиссия жанындағы сараптамалық топ мүшелері депутаттармен кездесуден соң Абай облысы әкімі жанындағы әйелдер істері және отбасылық-демографиялық саясат жөніндегі комиссия мүшелерімен жүздесті.
Іс-шара барысында электронды темекіге тыйым салу, лудомания, медресе жұмыстарын реттеу, сондай-ақ оңалту орталықтарын көбейту, жалғыз басты әкелердің жағдайын қадағалау мәселелері талқыланды.
— Облыс әкімі жанындағы комиссия барлық іс-шараларды өз бақылауына алуы қажет. Сонда ғана жұмыс нәтижелі болмақ, — деді Ләззат Сүлеймен.
Сараптамалық топ мүшелері Абай облысының әкімі Нұрлан Ұранхаевпен де кездесті. Облыс басшысы барлық жағдайда көмек көрсетілетінін жеткізді .
Өз тілшіміз
